ജോഷി സംവിധാനം ചെയ്ത റണ് ബേബി റണ് എന്ന ചിത്രത്തിന്റെ ഷൂട്ടിംഗ് പൂര്ത്തിയായതോടെ മോഹന്ലാല് ഇനി ഒരു മാസം അഭിനയത്തില്നിന്ന് അവധിയെടുക്കുകയാണെന്ന് അദ്ദേഹവുമായി അടുത്ത വൃത്തങ്ങള് വെളിപ്പെടുത്തുന്നു.
കുടുംബത്തോടൊപ്പം കുറച്ചുദിവസം റിലാക്സ്ഡായി കഴിയാനും വര്ഷം തോറും പതിവുള്ള ചില ആയുര്വ്വേദ ചികിത്സകള്ക്കുമായാണ് ലാല് സ്റ്റാര്ട്ട് കട്ടുകളോട് ഒരു മാസത്തെ അവധി പറയുന്നതെന്നാണ് കേള്ക്കുന്നത്. ബി.ഉണ്ണികൃഷ്ണന്റെ 'ഗ്രാന്റ്മാസ്റ്റര്', രഞ്ജിത്തിന്റെ 'സ്പിരിറ്റ്', ജോഷിയുടെ 'റണ് ബേബി റണ്' എന്നീ ചിത്രങ്ങളുടെ ഷൂട്ടിംഗുമായി ബന്ധപ്പെട്ട് കുറേനാളുകളായി ലാല് ഏറെ തിരക്കിലായിരുന്നു.
മാത്രവുമല്ല ലാലിന്റെ അമ്മ ശാന്തകുമാരി ഏറെ നാളുകളായി രോഗബാധിതയായി ഇടപ്പള്ളിയിലെ അമൃത ആശുപത്രിയില് ചികിത്സയിലാണ്. ഇക്കാര്യത്താല് ലാലിന്റെ പ്രത്യേക താല്പര്യം പരിഗണിച്ച് അദ്ദേഹത്തിന്റെ സിനിമകളുടെ ഏറിയപങ്കും ചിത്രീകരിച്ചത് എറണാകുളത്തും പരിസരപ്രദേശങ്ങളിലും വച്ചാണ്. ഇത്രനാളും ഷൂട്ടിംഗ് ലൊക്കേഷനുകളും ആശുപത്രിയുമായി കഴിച്ചുകൂട്ടുകയായിരുന്നു ലാല്. ഇനി ഈ തിരക്കുകളില് നിന്ന് കുറച്ചുദിവസത്തേക്ക് ഫ്രീയായി കുടുംബത്തോടൊപ്പംകൂടി ഒന്നു റിഫ്രഷ് ആവാനും ഒപ്പം പതിവുള്ള ചില ആയുര്വ്വേദ ചികിത്സകളുമായി ഒരു മാസം കൂടാനുമാണ് മോഹന്ലാലിന്റെ പദ്ധതി.
ഒരു മാസത്തെ അവധി കഴിഞ്ഞ് ലാല് ആദ്യം അഭിനയിക്കുക മേജര് രവിയുടെ 'ദി ചേസി'ലാവുമെന്നാണ് അറിയുന്നത്. ഓഗസ്റ്റ് ആദ്യവാരം 'ദി ചേസി'ന്റെ ഷൂട്ടിംഗ് ആരംഭിക്കും. കൂടാതെ പ്രിയദര്ശന് സംവിധാനം ചെയ്യുന്ന പുതിയ മലയാളചിത്രത്തിന്റെ ഷൂട്ടിംഗ് സെറ്റില് വരുന്ന സെപ്റ്റംബറില് മോഹന്ലാല് ജോയിന് ചെയ്യുമെന്നാണ് അറിയുന്നത്. പ്രിയന് ചിത്രത്തില് ദുല്ക്കര് സല്മാന്റെ അച്ഛന് വേഷത്തിലാണ് മോഹന്ലാല് പ്രത്യക്ഷപ്പെടുകയെന്നു കേള്ക്കുന്നു. മോഹന്ലാലിന്റെ ഓണച്ചിത്രമാണ് 'റണ് ബേബി റണ്'. അമലപോളാണ് ഇതില് ലാലിന്റെ നായിക.
കടപ്പാട്-mangalam.com