ചങ്ങനാശ്ശേരി താലൂക്കിലെ കരിങ്കല്‍ ക്വാറി ഉടമകള്‍ കരിങ്കല്ല് ഉത്പന്നങ്ങളുടെ വില അനധികൃതമായി വര്‍ധിപ്പിച്ച നടപടി എ.ഡി.എം. റദ്ദാക്കി. രണ്ടാഴ്ചമുമ്പാണ് കരിങ്കല്‍ ക്വാറി ഉടമകള്‍ വില വര്‍ധിപ്പിച്ചത്. ജില്ലാ കളക്ടറുടെ അധ്യക്ഷതയില്‍ ഏറ്റവുമൊടുവില്‍ ചേര്‍ന്ന യോഗത്തില്‍ എടുത്ത തീരുമാനമനുസരിച്ചുള്ള വിലയ്ക്കുതന്നെ കരിങ്കല്ല് നല്‍കാന്‍ ഇന്നലെ എ.ഡി.എം നിര്‍ദേശം നല്‍കി.
2013 മാര്‍ച്ച് 31വരെ കരിങ്കല്ലിന് വില വര്പ്പി‍ധക്കരുതെന്ന് ജില്ലാ കളക്ടര്‍ നേരത്തെ ഉത്തരവ് നിലനില്‍ക്കെയാണ് പാറമടയുടമകള്‍ ഏകപക്ഷീയമായി വില ഉയര്‍ത്തിയത്.ഇതിനെതിരെ ടിപ്പര്‍ ലോറി ഓണേഴ്‌സ് അസോസിയേഷനും മിനി ടിപ്പര്‍ ലോറി ഓണേഴ്‌സ് അസോസിയേഷനും നല്‍കിയ പരാതിയിന്മേലാണ് വ്യാഴാഴ്ച കളക്ടറേറ്റില്‍ ചര്‍ച്ച നടന്നത്.
രണ്ടു സംഘടനകളും നേരത്തെ വില വര്‍ധനയില്‍ പ്രതിഷേധിച്ച് രണ്ട് സമരം പ്രഖ്യാപിക്കുകയും കരിങ്കല്ല് കയറ്റാന്‍ വിസമ്മതിക്കുകയുംചെയ്തിരുന്നു. സമരം ദീര്‍ഘിച്ച സാഹചര്യത്തില്‍ തൊഴില്‍ നഷ്ടപ്പെട്ട തൊഴിലാളികള്‍ മറ്റ് ലോഡുകളുമായി പോകുന്ന വാഹനങ്ങളും തടഞ്ഞു.
നെടുംകുന്നം മേഖലയിലെ പാറമട തൊഴിലാളികള്‍ സമരം നടത്തിതിനെത്തുടര്‍ന്ന് മട ഉടമകളും ലോറിക്കാരും കറുകച്ചാല്‍ പോലീസില്‍ പരാതി നല്‍കി. പോലീസ് സ്റ്റേഷനില്‍ വിളിച്ചു ചേര്‍ത്ത യോഗത്തില്‍ കരിങ്കല്ലിന് വില വര്‍ധിപ്പിക്കാന്‍ തീരുമാനിച്ചതായി പാറമട ഉടമകള്‍ അറിയിച്ചു. ഇത് അംഗീകരിക്കാന്‍ ലോറി ഉടമകള്‍ തയാറായില്ല.
രണ്ടാഴ്ച മുമ്പ് മുതല്‍ ക്വാറി ഉടമകള്‍ 150 അടി കരിങ്കല്ലിന് 1650 രൂപ നിരക്കില്‍ വാങ്ങിത്തുടങ്ങി. 2013 മാര്‍ച്ച് 31വരെ 150 അടി കരിങ്കല്ലിന് 1400 രൂപയാണ് വില നിശ്ചയിച്ചിരുന്നത്. ഇതിന് വിപരീതമായി വിലവര്‍ധിപ്പിച്ച നടപടിയാണ് എ.ഡി.എം. റദ്ദാക്കിയത്.
വില വര്‍ധിപ്പിക്കാനായി പാറമട ഉടമകള്‍ അപേക്ഷ നല്‍കിയിരുന്നില്ല. ജില്ലാ ഭരണകൂടത്തിന്
അപേക്ഷ നല്‍കുകയോ ചര്‍ച്ചചെയ്യാതെയോ വില വര്‍ധിപ്പിച്ചത് അംഗീകരിക്കാനാവില്ലെന്ന് എ.ഡി.എം വ്യക്തമാക്കി. യോഗത്തില്‍ ടിപ്പര്‍ ലോറി ഓണേഴ്‌സ് അസോസിയേഷന്‍ സംസ്ഥാന പ്രസിഡന്റ് പ്രകാശ്, മിനി ടിപ്പര്‍ അസോസിയേഷന്‍ പ്രസിഡന്റ് എം.എസ്.നൗഷാദ്, എസ്‌കവേറ്റര്‍ സമിതി പ്രസിഡന്റ് സുഭാഷ്, കരിങ്കല്‍ ക്വാറി ഉടമകളുടെ സംഘടനാ ഭാരവാഹികള്‍, കോണ്‍ട്രാക്ടേഴ്‌സ് യൂണിയന്‍ പ്രതിനിധികള്‍, എര്‍ത്ത് മൂവേഴ്‌സ് അസോസിയേഷന്‍ പ്രതിനിധികള്‍ തുടങ്ങിയവര്‍ പങ്കെടുത്തു.
.jpg)
