നെടുംകുന്നം ക്രിസ്മസ് മൂഡില്‍

നമ്മടെ നാട്ടില്‍ പൊതുവേ ക്രിസ്മസ് കരോള്‍ സംഘങ്ങള് എറങ്ങിത്തൊടങ്ങുന്നത് ഏതു ദെവസമാണെന്ന് പിടിയുമുണ്ടോ?. ഡിസംബര്‍ 23ന് എന്നാകും പലരും പറയുക. പണ്ടൊക്കെ അങ്ങനെയാരുന്നല്ലോ. പക്ഷെ, ഇത്തവണ സ്ഥിതി അതല്ല. ഇന്നലെ, അതായത് ഡിസംബര്‍ 22ന് നെടുംകുന്നത്തും കറുകച്ചാലിലുമൊക്കെ പാട്ടു സംഘങ്ങളുടെ ബഹളമായിരുന്നു.

കരോളുകാരുടെ സെറ്റപ്പിനൊന്നും കാര്യവായ വ്യത്യാസം വന്നിട്ടില്ല. മുളങ്കമ്പുകൊണ്ടുണ്ടാക്കിയ ചട്ടക്കൂടിന്‍റെ പൊറത്ത് വര്‍ണ്ണക്കടലാസൊട്ടിച്ച നക്ഷത്രം. വലിയൊരു കമ്പിന്‍റെ മോളില്‍ കെട്ടിവച്ച നക്ഷത്രത്തിനകത്ത് പാട്ടവെളക്ക്. പിന്നെ ക്രിസ്മസ് അപ്പൂപ്പന്റെ വേഷം കെട്ടിയ ഒരാള്. ഏറ്റവും പുതിയ സിനിമാ പാട്ടുകളുടെ ട്യൂണിലൊള്ള കരോള്‍ പാട്ട്.

ഇന്നലെ കറുകച്ചാലില് രണ്ടോ മൂന്നോ കരോള്‍ ടീമൊണ്ടാരുന്നു. കവലേലെ കടകള്‍ തോറും നടന്നാണ് അവര് പാട്ടുപാടിയത്. എക്കാലത്തെയും ഹിറ്റ് ക്രിസ്മസ് പാട്ടുകള് സിഡി പ്ലേയറിലിട്ട് റെക്കോര്‍ഡുവച്ച് കവലേല്‍ കറങ്ങിയ സംഘം പുതിയ കാഴച്ചയാരുന്നു. നെടുംകുന്നത്ത് പള്ളിപ്പടിക്കലും മാണികൊളത്തും മാന്തുരുത്തീലുമൊക്കെ ഇന്നെല കരോളുകാരിറങ്ങി. 

എന്തൊക്കെപ്പറഞ്ഞാലും ഇത്തവണ ക്രിസ്മസ് ആഘോഷം പഴേതിനേക്കാളൊക്കെ അടിപൊളിയാണെന്നു തോന്നുന്നു. കറുകച്ചാലിലാണ് ഏറ്റോം കൂടുതല്‍ ഓളം. പല കടകളിലും  വിയ്ക്കാനുള്ള നക്ഷത്രങ്ങളും വര്‍ണ്ണ വിളക്കുകളും രാത്രിയെ പകലാക്കുന്നു. പടക്കം വിയ്ക്കുന്ന പത്തോളം കടകളിലും നല്ല തെരക്കാണ്.  അത്രേം വരത്തില്ലേലും കാവുംനടേലും പള്ളിപ്പടക്കലുമൊക്കെ ക്രിസ്മസ് മൂഡായിക്കഴിഞ്ഞു.

മറ്റ് ആഘോഷങ്ങള്‍ പോലെതന്നെ ക്രിസ്മസിനും നെടുംകുന്നത്ത് ജാതീടേം മതത്തിന്റേമൊന്നും അതിര്‍വരമ്പുകളില്ല. അതുകൊണ്ടുതന്നെ അക്രൈസ്തവരുടെ വീടുകളിലും കടകളിലും നക്ഷത്രോം വര്‍ണ്ണ ലൈറ്റുകളുമൊന്നും കണ്ടാല്‍ ആരും അത്ഭുപ്പെടേണ്ട. കാരണം  ഇത് നെടുംകുന്നമാണ്. 

വീടുകളില്‍ നക്ഷത്രമിടീലും ക്രിസ്മസ് ട്രീയും പുല്‍ക്കൂടും ഒരുക്കലുമൊക്കെ അവസാന ഘട്ടത്തിലാണ്. നെടുംകുന്നം പള്ളീല്‍ പുല്‍ക്കൂട് നിര്‍മാണം പുരോഗമിക്കുന്നു. പതിവുപോലെ സി.വൈ.എം.എ പ്രവര്‍ത്തകരാണ് പള്ളീല് പുല്‍ക്കൂടൊരുക്കുന്നത്. 
നമുക്ക് ഓരോരുത്തര്‍ക്കും ഈ ആഘോഷത്തില്‍ പങ്കുചേരാം. നെടുംകുന്നം നാട്ടുവിശേഷത്തിന്‍റെ എല്ലാ സ്‌നേഹിതര്‍ക്കും, പ്രത്യേകിച്ച്, പ്രവാസികള്‍ക്ക് ആഹ്ലാദത്തിന്റെയും അനുഗ്രഹത്തിന്‍റെയും ക്രിസ്മസ് ആശംസിക്കുന്നു.