കാലത്തിനൊത്ത് പാലപ്പത്തിന്‍റെ ഒരു പോക്കേ...

ഇതോടൊപ്പം കൊടുത്തിരിക്കുന്ന പടം കാണുമ്പം നിങ്ങക്ക് പ്രത്യേകിച്ചൊന്നും തോന്നത്തില്ലെന്ന് ഞങ്ങക്കറിയാം. പക്ഷെ, ഒരു പത്തിരുപതു കൊല്ലം മുമ്പാരുന്നേല്‍ എന്തോ ഒരു ഇത് തോന്നത്തില്ലാരുന്നോ? അതിനെക്കുറിച്ചാണ് ഇവിടെ ഒരു കുറിപ്പെഴുതാവെന്നു വിചാരിച്ചത്.

പണ്ടൊക്കെ നമ്മടെ വീടുകളിലെ വി.ഐ.പിയല്ലാരുന്നോ പാലപ്പം? ആകെ പാലപ്പം ഒണ്ടാക്കുന്നത് ക്രിസ്മസിനും പെരുന്നാളിനും ഈസ്റ്ററിനുമൊക്കെ മാത്രം. ഒണ്ടാക്കണേലോ? അരി വെള്ളത്തിലിട്ട് മില്ലിക്കൊണ്ടുപോയി കാത്തുനിന്ന് പൊടിപ്പിക്കണം. വറക്കുന്നേനു മുമ്പൊള്ള പച്ചപ്പൊടികൊണ്ടാണ് പാലപ്പം ഒണ്ടാക്കുന്നത്.  

അതുകൊണ്ടു തീര്‍ന്നില്ല. തലേദെവസം ഷാപ്പിപ്പോയി കള്ളു മേടിക്കണം. അപ്പത്തിനൊള്ള മാവു പുളിച്ചു പൊങ്ങാന്‍ അതിച്ചേര്‍ക്കുന്നത് ഫ്രഷ് കള്ളാരുന്നു. അപ്പത്തിനു മേടിക്കുന്ന കൂട്ടത്തില്‍ ഇച്ചിര കൂടുതലു മേടിച്ചാല് അത്യാവശ്യത്തിന് ഒരു ചെറിയ പിടി പിടിക്കുകേം ചെയ്യാം. കള്ളുമേടീരു കഴിഞ്ഞൊള്ള എടപാടെല്ലാം അമ്മച്ചിമാരുടെ ഏരിയയല്ലേ?.

പിറ്റേന്നു പുലര്‍ച്ചെ പൊതപ്പ് വലിച്ചുകേറ്റി അവസാനവട്ട ഒറക്കത്തിനൊരുങ്ങുമ്പം അടുക്കളേന്ന് അപ്പച്ചട്ടീലെ ആദ്യത്തെ പാലപ്പത്തിന്‍റെ മണംവരും. പിന്നെ കെടന്ന് ഒറങ്ങാന്‍ മനസ്സും നാക്കും അനുവദിക്കുകേല. ചാടിയെഴുന്നേറ്റ് ഉമിക്കരിയിട്ട് പല്ലുതേച്ച് അടുക്കളേലേക്ക് പായും. അപ്പഴത്തേക്കും മൊറത്തില് മൂന്നാലപ്പം റെഡിയായിട്ടൊണ്ടാകും. നടുഭാഗം വെന്തു പൊങ്ങി, അരിക് നന്നായി മൊരിഞ്ഞ അപ്പം! ഹൊ! അതിലൊന്നെടുത്ത് നടുക്ക് പഞ്ചാരയിടും. അപ്പം ചൂടായകൊണ്ട് പഞ്ചാര ഉരുകി അപ്പത്തീച്ചേരും. എന്നിട്ട് അതു ചുരുട്ടി ഒരു പിടി പിടി.. ഹൊ!.. ആ ടേസ്റ്റ് പറഞ്ഞറിയിക്കാമ്പറ്റുന്നതല്ല.

ചെലപ്പം ഒന്നേ നിര്‍ത്തും. അല്ലേ ഒന്നോ രണ്ടോ അപ്പംകൂടെ വച്ചുകാച്ചും. ക്രിസ്മസിനോ ഈസ്റ്ററിനോ പള്ളിപ്പെരുന്നാളിനോ ഒക്കെയാരിക്കും പാലപ്പം ഒണ്ടാക്കുന്നേന്ന് നേരത്തെ പറഞ്ഞില്ലേ. അതുകൊണ്ടുതന്നെ അന്ന് എറച്ചീം കാണും. കാളയോ പോത്തോ കോഴിയോ എന്നതേലും. ഈ പറഞ്ഞതൊക്കെ ഇപ്പം ഏതു ദിവസം വേണേലും കിട്ടും. പണ്ടൊക്കെ ഞാറാഴ്‌ച്ചേം വിശേഷദിവസോം മാത്രേ പോത്തെറച്ചീം കാളയെറച്ചീം കിട്ടത്തൊള്ളു.  

കോഴീടെ കാര്യം പറയുകേ വേണ്ട. അതെന്നാ കോഴിയില്ലേ? എന്നാരിക്കും പിള്ളാരു സെറ്റിന്‍റെ മനസ്സിത്തോന്നുക. ഇപ്പഴത്തെ ബ്രോയിലര്‍ കോഴിക്കച്ചോടം അന്നില്ല. പിന്നെ വീട്ടി വളത്തുന്ന കോഴിയെയാണ് കൊല്ലുന്നത്. ആ പരിപാടീം കൂടുതല്‍ വിശേഷദിവസങ്ങളിലാ. അതേക്കുറിച്ച് നൊസ്റ്റാള്‍ജിയേല്‍ പിന്നീട് വിശദമായി പറായം. അപ്പം പറഞ്ഞുവന്ന കാര്യം. ഒമ്പതു മണി, പത്തുമണിയാകുമ്പം എറച്ചികൂട്ടി ഒന്നോ രണ്ടോ അപ്പംകൂടെ തിന്നും.

അതൊക്കെ പോയിട്ട് ഇപ്പഴത്തെ സ്ഥിതിയെന്നാ? എപ്പം വേണേലും അപ്പം റെഡി. നാട്ടിലൊള്ള സര്‍വമാന ഹോട്ടലുളിലും ബേക്കകറികളിലും അപ്പവൊണ്ട്. ഓര്‍ഡറനുസരിച്ച് എവിടെയും ഏതു സമേത്തും അപ്പം എത്തിച്ചുകൊടുക്കുന്ന പാര്‍ട്ടികള് ഒരുപാടൊണ്ട്. അരി പൊടിക്കാന്‍ മില്ലിപ്പോയി കാത്തുകെട്ടി കെടക്കണ്ട. മിക്കവാറും വീടുകളില് മിക്‌സീം ഗ്രൈന്‍ററുമൊക്കെയായി. 

പോരാത്തതിന് പാലപ്പം പെട്ടെന്ന് ഒണ്ടാക്കാനൊള്ള ചേരുവയെല്ലാം അടങ്ങിയ പാലപ്പം മിക്‌സും വാങ്ങിക്കാന്‍ കിട്ടും. അതോണ്ടുതന്നെ നാടുവിട്ടു പോകുന്നോര്‍ക്ക് പാലപ്പം തിന്നാന്‍ അവധിക്ക് വീട്ടി വരേണ്ട കാര്യവില്ല. പക്ഷെ, ഒരു കാര്യം, പണ്ട് ഫ്രഷ് പൊടീം കള്ളും ചേര്‍ത്ത് പഴയ അപ്പച്ചട്ടീല് ഒണ്ടാക്കീരുന്ന പാലപ്പത്തിന്‍റെ വാലേക്കെട്ടാന്‍ കൊള്ളുവോ ഇപ്പഴത്തെ അപ്പം? മാത്രമല്ല, ലാഭമൊണ്ടാക്കാന്‍ ബട്ടന്‍സ് വലിപ്പത്തിലാക്കി പാലപ്പത്തിന്‍റെ മാനം കെടുത്തിയില്ലേ നമ്മടെ കച്ചോടക്കാര്?