.jpg)
നെടുമ്പാശ്ശേരി: കൊച്ചി അന്താരാഷ്ട്ര വിമാനത്താവളത്തിലൂടെ മനുഷ്യക്കടത്തിന് നേതൃത്വം നല്‍കിയ സംഭവത്തില്‍ പോലീസ് കോണ്‍സ്റ്റബിള്‍ എ.പി. അജീബിനെ അന്വേഷണ വിധേയമായി സസ്‌പെന്‍ഡു ചെയ്തു. നെടുമ്പാശ്ശേരി പോലീസ് സ്റ്റേഷനിലെ കോണ്‍സ്റ്റബിളാണ് അദ്ദേഹം.
മനുഷ്യക്കടത്തില്‍ എമിഗ്രേഷന്‍ വിഭാഗത്തില്‍ മുമ്പ് ജോലി നോക്കിയിരുന്ന ഡിവൈ.എസ്.പി. അടക്കമുള്ള ഉന്നതര്‍ക്കും പങ്കുണ്ടെന്ന് അന്വേഷണത്തില്‍ കണ്ടെത്തിയിട്ടുണ്ട്. ഇവര്‍ക്ക് എതിരെയുള്ള നടപടി ഡി.ജി.പി.യുടെ ശുപാര്‍ശയോടെ സര്‍ക്കാര്‍ സ്വീകരിക്കും.
മനുഷ്യക്കടത്ത് സംബന്ധിച്ച് അന്വേഷണ ഉദ്യോഗസ്ഥന്‍റെ റിപ്പോര്‍ട്ട് ഡി.ജി.പി.ക്ക് കൈമാറി.
സസ്‌പെന്‍ഷനിലായ കോണ്സ്റ്റബിളിന്റെ അച്ഛന്‍റെ ബാങ്ക് അക്കൗണ്ടിലേക്ക് 60 ലക്ഷം രൂപ വിവിധ ട്രാവല്‍ ഏജന്‍സികളും മറ്റും നിക്ഷേപിച്ചതായും കണ്ടെത്തി. പോലീസ് കോണ്‍സ്റ്റബിളിന് അഞ്ച് മൊബൈല്‍ നമ്പറുകള്‍ ഉണ്ട്. ഇതില്‍ മൂന്ന് സിം കാര്‍ഡുകള്‍ കൊച്ചി വിമാനത്താവളം വഴി യാത്ര ചെയ്ത മൂന്നുപേരുടെ മേല്‍വിലാസത്തില്‍ അവര്‍ അറിയാതെ എടുത്തിരിക്കുന്നതാണ്. പാസ്‌പോര്‍ട്ടില്‍നിന്ന് യാത്രക്കാരുടെ മേല്‍വിലാസവും ഫോട്ടോയും കോപ്പി എടുത്താണ് ഫോണ്‍ കണക്ഷന്‍ തരപ്പെടുത്തിയിരിക്കുന്നത്.
മനുഷ്യക്കടത്ത് തടയുന്നതിന് നടപടിയെടുക്കേണ്ട ഇന്‍റലിജന്‍സ് വിഭാഗത്തിലെ ഒരു സര്‍ക്കിള്‍ ഇന്‍സ്‌പെക്ടര്‍ക്ക് മനുഷ്യക്കടത്തിന് ചുക്കാന്‍ പിടിക്കുന്ന കോണ്‍സ്റ്റബിളുമായി അടുത്തബന്ധമുള്ളതായും കണ്ടെത്തിയിട്ടുണ്ട്.
1074 കോളുകളാണ് സര്‍ക്കിള്‍ ഇന്‍സ്‌പെക്ടറുടെ ഫോണിലേക്ക് പോലീസ് കോണ്‍സ്റ്റബിള്‍ വിളിച്ചിരിക്കുന്നത്. ഒരു പ്രത്യേകദിവസം മാത്രം 55 കോളുകള്‍. രാത്രി 10 മുതല്‍ രാവിലെ ഒന്‍പതുവരെയുള്ള സമയത്താണ് കോളുകളില്‍ അധികവും.
ഗള്‍ഫിലേക്ക് കൂടുതല്‍ വിമാനങ്ങള്‍ സര്‍വീസ് നടത്തുന്ന സമയമാണിത്. വിദേശത്തുനിന്നടക്കം കോണ്സ്റ്റബിളിന്റെ ഫോണിലേക്ക് നിരവധി കോളുകള്‍ വന്നിട്ടുണ്ട്.
കോട്ടപ്പടി, കൊരട്ടി, കലൂര്‍ എന്നിവിടങ്ങളില്‍ താമസിക്കുന്ന മൂന്നുപേരുടെ മേല്‍വിലാസത്തിലാണ് കോണ്‍സ്റ്റബിള്‍ ഫോണ്‍ കണക്ഷന്‍ എടുത്തിരിക്കുന്നത്. എന്നാല്‍ ഇവര്‍ക്ക് ഇക്കാര്യമറിയില്ല.
ട്രാവല്‍ ഏജന്‍സികള്‍ അക്കൗണ്ടില്‍ ഇടുന്ന പണം അടുത്തദിവസം എ.ടി.എം. വഴി പിന്‍വലിക്കുകയാണ് പതിവ്. മനുഷ്യക്കടത്തിന് കൂട്ടുനില്‍ക്കുന്ന ഉദ്യോഗസ്ഥര്‍ക്കായാണ് പണം ഇടുന്നതത്രെ.
മനുഷ്യക്കടത്തിനെക്കുറിച്ച് ഐ.ജി.ക്ക് ലഭിച്ച പരാതികളുടെ അടിസ്ഥാനത്തില്‍ ഡിവൈ.എസ്.പി. സോമരാജന്റെ നേതൃത്വത്തിലായിരുന്നു അന്വേഷണം. റിപ്പോര്‍ട്ട് ഒക്ടോബറില്‍ ഡി.ജി.പി.ക്ക് സമര്‍പ്പിച്ചിരുന്നു.
2003 ലാണ് അജീബ് വിമാനത്താവളത്തിലെ എമിഗ്രേഷന്‍ വിഭാഗത്തില്‍ കോണ്‍സ്റ്റബിളായി എത്തിയത്. പിന്നീട് സ്ഥലം മാറി പോയെങ്കിലും 2007 ല്‍ തിരിച്ചെത്തി. 2011ല്‍ വീണ്ടും സ്ഥലംമാറ്റി. എന്നാല്‍ സ്വാധീനമുപയോഗിച്ച് അജീബ് വീണ്ടും വിമാനത്താവളത്തിലെത്തുകയായിരുന്നു. വിമാനത്താവളത്തിലെ ചില മുന്‍ ഡിവൈ.എസ്.പി.മാര്‍ക്കും ഇപ്പോഴുള്ള ചിലര്‍ക്കും മനുഷ്യക്കടത്തുമായി ബന്ധമുണ്ടെന്ന് റിപ്പോര്‍ട്ടില്‍ പറയുന്നു.
പോലീസ് കോണ്‍സ്റ്റബിള്‍ ഒരു മാസമായി മെഡിക്കല്‍ ലീവിലാണ്. ഇയാള്‍ക്കെതിരെ ആലുവ ഡിവൈ.എസ്.പി. കേസ്സെടുത്തിട്ടുണ്ട്. മറ്റുള്ളവരുടെ മേല്‍വിലാസത്തില്‍ സിം കാര്‍ഡ് എടുത്ത് ഉപയോഗിച്ചതിനാണ് കേസ്. രാഷ്ട്രീയ ഇടപെടല്‍ ഉള്ളതിനാലാണ് നടപടികള്‍ വൈകുന്നതെന്നാണ് സൂചന.
(വാര്‍ത്തയ്ക്ക് കടപ്പാട്-മാതൃഭൂമി ഡോട് കോം)
No comments:
Post a Comment