അങ്ങനെ പെരുന്നാളും കഴിഞ്ഞു!

കാത്തുകാത്തിരുന്ന ആഘോഷങ്ങള് പെട്ടെന്ന് വന്നുപോയപോലെ.. നമ്മടെ പള്ളിപ്പെരുന്നാളിന്‍റെ.. സോറി തിരുന്നാളിന്‍റെ കാര്യവാ പറഞ്ഞേ. ഇന്നു വൈകുന്നേരം വികാരിയച്ചനാ കൊടിയെറക്കിയത്.

കൊടിയെറക്കിന്‍റെ കുര്‍ബാനയ്ക്കും പ്രദക്ഷിണത്തിലുമൊക്കെ ഇത്രേംകാലോമില്ലാത്ത തെരക്കാരുന്നു. നമ്മടെ ഗ്രൗണ്ടിലെ കാര്യംപിന്നെ പറയണ്ടല്ലോ. ഉഴുന്നാടേം ഈന്തപ്പഴേം അലുവേം ചോളമലരും പ്ലാസ്റ്റിക്ക് വളേം ബലൂണും കളിപ്പാട്ടങ്ങളും പാത്രങ്ങളും പിച്ചാത്തീം വെട്ടുകത്തീം കൊട്ടേം മൊറോം ചൂലും പായേമൊക്കെ ഇപ്പഴത്തെ കാലത്ത് എപ്പം വേണേലും വാങ്ങിക്കാവെങ്കിലും പെരുന്നാളിന് വങ്ങിക്കുമ്പോ എന്തോ ഒരു ഇത്.. ഒണ്ടല്ലോ. പിന്നെ ഗ്രൗണ്ടില് ആള്‍ക്കൂട്ടത്തിനെടേക്കൂടെ ചുമ്മാ നടക്കുന്നേന്‍റെ 

രസോം നമ്മള് നെടുങ്ങോത്തുകാര്‍ക്കേ മനസ്സിലാകത്തൊള്ളൂ. 

ദേ ഇതെഴുമ്പഴും ഗ്രൗണ്ടില്‍ ആളിന് പഞ്ഞവില്ല. ഏറ്റവും ആള് അമ്യൂസ്‌മെന്‍റ് പാര്‍ക്കിലാണ്. മനസ്സിലായില്ലേ? നമ്മടെ തൊട്ടിയാട്ടോം ട്രെയിനുമൊക്കെയൊള്ള എടപാടേ..?

 സ്‌കൂള്‍ ഗ്രൗണ്ടില് നാടകം നടക്കുവാ. കൊല്ലം അയനം നാടകവേദിയൂടെ 'സ്വര്‍ഗം ഭൂമിയിലാണ്' ആണ് നാടകം. അതൂടെ കഴിഞ്ഞാ കഴിഞ്ഞു. കടക്കാരൊക്കെ ഇന്നലെ മൊതല് കെട്ടുകെട്ടിത്തൊടങ്ങി. പാറേപ്പള്ളീല് പെരുന്നാക്കോള് ഉഷാറായിട്ടൊണ്ട്. ബാക്കി കടക്കാര് രണ്ടൂന്നു ദിവസംകൊണ്ട് പോകും. അതോടെ നമ്മടെ ഗ്രൗണ്ട് കാലിയാകും.

പെരുന്നാളു കൂടാന്‍ വന്ന ലോക്കല്‍ പ്രവാസികള്, എന്നുവച്ചാല് എറണാകുളത്തും തിരുവന്തോരത്തുമൊക്കെ ജോലിചെയ്യുന്നോര് പോയിക്കഴിഞ്ഞു. കേരളത്തിനും രാജ്യത്തിനും പൊറത്തൂന്ന് വന്നോര് വൈകാതെ സ്ഥലം കാലിയാക്കും.

അപ്പ ഇനി?..അടുത്ത പെരുന്നാളുവരെ കാത്തിരിക്കാം. അല്ലേ?