ക്രിസ്മസിന്‍റെ താരമായി ശശിലൈറ്റ്

ഷിവാസ് റീഗല്‍ സ്‌കോച്ച് വിസ്‌കിയടിക്കാന്‍ ആശിക്കും. പോക്കറ്റിന്റെ സെറ്റപ്പ് അതിന് സമ്മതിക്കാത്തപ്പം എന്നാ ചെയ്യും? കൂതറ സല്‍സയടിച്ച് ആശ തീര്‍ക്കും അത്രതന്നെ!. ക്രിസ്മസിന് നാലു ദിവസംകൂടി നീണ്ടുനെവര്‍ന്ന് കെടക്കുമ്പം സെറ്റപ്പിന്റെ കാര്യവല്ല പറഞ്ഞുവരുന്നേ. അതു വെറുതെ ഒന്നു ഉദാഹരിച്ചതാ.

ചെറിയൊരു തൊളേന്ന് ഒരുപാടു ദൂരം കളര്‍വെട്ടം എത്തിക്കുന്ന ലേസര്‍ ലൈറ്റ് എല്ലാര്‍ക്കും  ഇഷ്ടവാണ്. അതേലൊരെണ്ണം ഒണ്ടാരുന്നേല്‍ ക്രിസ്മസിന്റെ അലങ്കാരത്തിനും അഹങ്കാരത്തിനും ഒരു ഗുമ്മായേനേന്ന് ആശിക്കാത്തോര് കുറവാണ്. പക്ഷെ ആശിക്കുന്നോര്‍ക്കെല്ലാം സാധനം വാങ്ങാമ്പറ്റത്തില്ല. കാരണം വെല ആയിരത്തിനു മോളിലാണ്. അതുകൊണ്ടുതന്നെ അത്യാവശ്യം സെറ്റപ്പു പാര്‍ട്ടികള് പ്രത്യേകിച്ചും ഫോറിങ്കാരാണ് ഈ സാധനം വച്ച് ഷോ കാണിച്ചോണ്ടിരുന്നത്. 

 അങ്ങനെയിരിക്കുമ്പാണ് ലേസര്‍ ലൈറ്റ് എന്ന ഷിവാസ് വാങ്ങാന്‍ പാങ്ങിലാത്തോര്‍ക്കുവേണ്ടി ചൈനേലെ സഖാക്കള് ഒരു സല്‍സ കളത്തിലിറക്കിയത്. വെല നൂറ്റമ്പതു രൂപ മാത്രം. ഒറ്റ നോട്ടത്തില് സംഗതി ഒരു ബള്‍ബാണ്. ഹോള്‍ഡറിലിട്ട് സുച്ചിട്ടാ പല നെറത്തില്‍ വെട്ടം വരും. ബള്‍ബിന്റെ അറ്റത്തൊരു ഭാഗം വട്ടത്തി കറങ്ങുകേം ചെയ്യും. ഇതിന്റെ അകത്തെ  മൂന്നു കളറിലൊള്ള എല്‍.ഇ.ഡി ബള്‍ബുകടെ വെട്ടം കറങ്ങിക്കോണ്ടിരിക്കുന്ന ഗ്ലാസീക്കുടെ പൊറത്തുവരുമ്പം പല നെറത്തിലൊള്ള വട്ടോം ചതുരോം ഷഡ്‌ജോമൊക്കെ പൊറത്തുകാണാം. സംഗതി സെറ്റപ്പ്!

എന്നുവച്ച്  ലേസര്‍ ലൈറ്റുവായിട്ടു വച്ചു നോക്കുമ്പം ഈ സാധനം ഒന്നുവല്ല. സല്‍സ എത്ര വാറ്റിയാലും ഷിവാസാവില്ലല്ലോ. എന്തായാലും പണ്ട് ഷക്കീലേ കാണാന്‍ തിയേറ്ററിപ്പോയിട്ട് സജിനിയേം മറിയേം സിന്ധൂനേം രേഷ്‌മേമൊക്കെ കണ്ട് ആശ്വസിച്ചോരാ നമ്മള് സാദാ മല്ലൂസ്. പിന്നാ ഇത്.

സാധനത്തിന്റെ പേര് ലിയോ മിനി പാര്‍ട്ടി ലൈറ്റ്! പോരാത്തതിന് ഒരു കോഡു നമ്പരുവൊണ്ട്-എല്‍വൈ 399. മറ്റു പല മൊതലുകടേം കാര്യം പോലെ  ഇതിന്റേം കമ്പനി ചൈന ജംഗ്ഷനിത്തന്നെയായിരിക്കും. അതുകൊണ്ടാന്നു തോന്നുന്നു, പ്രത്യേകിച്ചൊരു അഡ്രസൊ വെബ്‌സൈറ്റ് വിലാസോവോ ഒന്നും കവറിന്റെ പൊറത്തില്ല. പക്ഷെ, Patent products, counterfeiting not allowed  എന്ന് പ്രത്യേകം എഴുതിട്ടൊണ്ട്. 

  ഏതായാലും നമ്മടെ നാട്ടില് ഇത്തവണ ഇതില്ലാതെ ക്രിസ്മസ് ആഘോഷിക്കുന്ന വീടുതകള് കൊറവാ. പലേടത്തും ബീവറേജസ് ഷാപ്പുകളുടെ പരിസരത്താരുന്നു കച്ചോടം.  സാധനം ജനകീയമായതും അങ്ങനെയാന്നു തോന്നുന്നു. ചെലര് ഈ ലൈറ്റ് വീട്ടിന്ന് പുറത്തേക്കും ചെലര് പുറത്തൂന്ന് വീടിന്റെ ഭിത്തിയേലേക്കും മറ്റു ചെലര് ക്രിസ്മസ് ട്രീയേലേക്കുമൊക്കെ ഫോക്കസ് ചെയ്തു വച്ചിരിക്കുന്നു.

 ക്രിസ്മസ് പ്രമാണിച്ച് പുല്‍ക്കൂടും ക്രിസ്മസ് ട്രീയും നക്ഷത്രോം അങ്ങനെ പലതുമൊണ്ടേലും ഈ അടുത്ത കാലത്തൊന്നും ക്രിസ്മസിന് ഒരേ സാധനംതന്നെ ഇത്രയേറെ വീടുകളില്‍ കണ്ടിട്ടില്ല. മൂന്നാല് ആഴ്ച്ച മുമ്പ് ആദ്യംതന്നെ സാധനം വാങ്ങി വെറൈറ്റിയാക്കാന്‍ ശ്രമിച്ചോര് ഇപ്പം ശശിമാരായി!. അതുകൊണ്ടുതന്നെ ഈ സാധനത്തിന് ശശിലൈറ്റ് എന്ന ഓമനപ്പേരും വീണു. 

ഏതായാലും ഒരാഴ്ച്ച കഴിയുമ്പോ ആശാന്റെ പിക്കപ്പ് കൊറഞ്ഞ് കറക്കം മന്ദഗതിയിലായതായി റിപ്പോര്‍ട്ടൊണ്ട്. എന്തായാലെന്നാ നൂറ്റമ്പത് രൂപേടെ മൊടക്കല്ലേയൊള്ളൂ. ഇനീം മേടിക്കാത്തോര് വൈകിക്കണ്ട. പക്ഷെ, ഇനിയിപ്പം ശശിലൈറ്റ് എവിടേലും കിട്ടുവോന്നു സംശയവാ.