.jpg)
ഇത്തവണ നമ്മടെ പള്ളിപ്പെരുന്നാളിന്‍റെ ഒരു സ്പെഷ്യല്‍ ഐറ്റവാരുന്നു കുലുക്കി സര്ബത്ത്. കാവുന്നട പ്രദക്ഷിണത്തിന്‍റന്നും പെരുന്നാളിന്‍റന്നും കൊച്ചുപള്ളീടെ പരിസരത്താരുന്നു കച്ചോടം. പെരുന്നാളല്ലേ, എന്തെങ്കിലും ഒരു വെറൈറ്റി വേണ്ടേന്നു വിചാരിച്ചാണ് പലരും കുടിച്ചത്. ആദ്യം കുടിച്ചോര്‍ക്ക് ടേസ്റ്റ് പിടിച്ചു. പിന്നെ പറയണോ? പെരുന്നാപ്പറന്പില് കുലുക്കി സര്ബത്ത് സൂപ്പര്‍ഹിറ്റായി. സര്ബത്ത് കുലുക്കി, കച്ചോടക്കാരടെ കൈ കഴച്ചു. പെട്ടി നിറയെ കാശും വീണു.
ഇത്രേം പറഞ്ഞപ്പം കുലുക്കി സര്ബത്ത് എന്നാ കോപ്പാണെന്ന നിങ്ങക്ക് സംശയം തോന്നും.
ഞങ്ങള് ഇന്‍റര്‍നെറ്റില്‍ തപ്പിയപ്പം കിട്ടിയ വിവരം ഇങ്ങനാണ്- നാരങ്ങ ഗ്ലാസ്സിലേക്ക്‌ പിഴിഞ്ഞ് അതിന്‍റെ തൊണ്ട് ഗ്ലാസില്‍തന്നെ ഇടുക. കസ്കസ്, അരച്ച മിശ്രിതം, ഇഞ്ചിനീര്, സര്ബത്ത് (മധുരം വേണ്ടത്ര), ഐസ്, പച്ചമുളക് എന്നിവ ഗ്ലാസ്സിലേക്ക്‌ ഇടുക. വെള്ളം ഒഴിച്ച് ഗ്ലാസ്‌ നിറക്കുക. വേറൊരു ഗ്ലാസ്‌ കൊണ്ട് ഈ ഗ്ലാസ്‌ മൂടി നന്നായി കുലുക്കുക. എന്നിട്ട് കുടിക്കുക.
കുലുക്കുന്പം രണ്ടു ഗ്ലാസുകള്‍ക്കുള്ളില്‍ കിടന്ന് കുത്തിമറിയുന്ന സര്‍ബത്തിന്‍റെ കാര്യം ഒന്നു സങ്കല്‍പ്പിച്ചുനോക്ക്. കുടിച്ച പലരടേം വയറ്റിലെ കാര്യങ്ങള്‍ അധികം വൈകാതെ ഇങ്ങനെയായി. ചിലര്‍ വീട്ടിലേക്കോടി. ഓടാന്‍ ത്രാണിയില്ലാത്തോര് പള്ളിപ്പരിസരങ്ങളില്‍തന്നെ ഭൂതലസംപ്രേഷണം നടത്തി. നെടുംകുന്നത്തെ പല കക്കൂസുകളിലും ആഘോഷമായ പെരുന്നാള്‍ അരങ്ങേറി. നാട്ടിലെ പുലികള്‍ എളിമകൊണ്ട് നടുവളച്ചു. ഒച്ചത്തില് വര്‍ത്താനം പറയാന്‍പോയിട്ട്, കൂട്ടക്ഷരങ്ങള്‍ ഉച്ചരിക്കാന്‍പോലുമാകാതെ പാവങ്ങള്‍! ഗതികെട്ടപ്പോള്‍ മൊബൈല്‍ ഓഫാക്കാതെ ബാറ്ററി നീക്കം ചെയ്ത് പരിധിക്ക് പുറത്തായവര്‍ വേറെ.
കുലുക്കിസര്‍ബത്തുകച്ചോടക്കാരനെ പത്തു തെറി വിളിക്കാന്‍, പിടിച്ചൊന്നു കുലുക്കാന്‍ തോന്നിയെങ്കിലും അതിനുള്ള ത്രാണി എവിടെ?. രണ്ടു ദിവസം തുടര്‍ച്ചയായി ബാറ്റിംഗ് ചെയ്ത് ചിലര്‍ ഇന്നിംഗ്സ് ഡിക്ലയര്‍ ചെയ്തു. പക്ഷെ, അതിനുകഴിയാതെ ആശുപത്രി കയറേണ്ടിവന്നവരുമുണ്ട്. കൊടിയിറക്കുവരെ പള്ളിമൈതാനത്ത് രാജാക്കന്‍മാരായി വിലസുക എന്ന സ്വപ്നം പൊലിഞ്ഞതോര്‍ത്തിട്ടും പലരും കരഞ്ഞില്ല. കരഞ്ഞാല്‍ സംഗതി വീണ്ടും പാളും.
ഏതായാലും സര്‍ബത്തുകച്ചവടക്കാരനെ അഭിനന്ദിക്കാന്‍ സര്‍ബത്തു കുടിക്കാത്ത ചെലരെ ഏര്‍പ്പാടാക്കിയെങ്കിലും നെടുംകുന്നത്തിന്‍റെ അന്തരാളങ്ങളില്‍ കത്രീന ചുഴലിക്കാറ്റ് സൃഷ്ടിച്ച അവര്‍ പിറ്റേന്ന് നാടുവിട്ടിരുന്നു. പക്ഷെ, ഈ കത്രീന തെല്ലും ഏല്‍ക്കാത്തവരും ഉണ്ടെന്ന കാര്യം പറയാതിരിക്കാനാവില്ല.
കുലുക്കി സര്ബത്ത് എന്ന് മലയാളത്തില്‍ ടൈപ്പ് ചെയ്ത് ഗൂഗിളില്‍ തപ്പുന്പം കണ്ട ഒരു വാര്‍ത്തകൂടി ഇവിടെ ചേര്‍ക്കട്ടെ-
ദേശീയപാതയോരത്ത് വ്യാപകമായി കച്ചവടം നടത്തി വരുന്ന കുലുക്കി സര്ബത്ത് വില്‍പ്പനശാലകളില്‍ കളമശേരി നഗരസഭ ആരോഗ്യ വിഭാഗം ഉദ്യോഗസ്ഥര്‍ പരിശോധന നടത്തി.
കുലുക്കി സര്‍ബത്തിനും മറ്റും ഉപയോഗിക്കുന്ന ഐസ് നിലവാരമില്ലാത്തതാണെന്ന് പരിശോധനയില്‍ കണ്ടെത്തി. ഐസ് സൂക്ഷിക്കുന്ന തെര്‍മോക്കോള്‍ പെട്ടിയും വെള്ളം സൂക്ഷിക്കുന്ന കാനുകളും വൃത്തിയുള്ളവയല്ലെന്ന് പരിശോധന ഉദ്യോഗസ്ഥര്‍ പറഞ്ഞു. തങ്ങള്‍ ഉപയോഗിക്കുന്ന ഐസ് എവിടെയാണ്‌ ഉല്‍പ്പാദിപ്പിക്കുന്നതെന്ന്‌ പോലും കച്ചവടക്കാര്‍ക്ക്‌ അറിയില്ലെന്ന്‌ ആരോഗ്യ വിഭാഗം ഉദ്യോഗസ്ഥര്‍ പറഞ്ഞു.
No comments:
Post a Comment