.jpg)
പതാലില്‍ പി.വി. ജോണിന്‍റെ വിടിന്‍റെ ജനാലച്ചില്ലുകള്‍ മോഷ്ടാക്കള്‍ എറിഞ്ഞു തകര്‍ത്ത നിലയില്‍
പതാലില്‍ പി.വി. ജോണിന്‍റെ വിട്ടില്‍ മോഷ്ടാക്കള്‍ ആക്രമണത്തിന് ഉപയോഗിച്ച കല്ലുകള്‍
കൊച്ചുമെതിക്കളത്തില്‍ സെബാസ്റ്റ്യന്‍ വര്‍ക്കിയുടെ വീടിന്‍റെ പിന്‍വാതിലിന്‍റെ
പൂട്ട് തകര്‍ത്ത നിലയില്‍
നെടുംകുന്നം പള്ളിപ്പടിയില്‍ കാത്തലിക്ക് ബുക്ക് സെന്‍റര്‍ നടത്തുന്ന മഠത്തിന്‍പടി പതാലില്‍ പി.ജെ. ജോണിന്‍റെ വീട്ടില്‍നിന്നും രണ്ടര പവന്‍റെ സ്വര്‍ണ്ണമാലയും പാറയ്ക്കല്‍ സോണാവില്ലയില്‍(വട്ടപ്പാറ) സ്റ്റീഫന്‍ മാത്യുവിന്‍റെ വീട്ടില്‍നിന്നും ഏഴുന്നൂറ് കൊഴുങ്ങാലൂര്‍ചിറയ്ക്കു സമീപം പുതുപ്പറമ്പില്‍ ഓമനയുടെ വീട്ടില്‍നിന്നും 1300രൂപയും ഒരു വാച്ചുമാണ് കവര്‍ച്ച ചെയ്യപ്പെട്ടത്. പി.വി. ജോണിന്‍റെ മകന്‍ വിനോദിന്‍റെ ഭാര്യ ബിന്ദുവിന്‍റെ കഴുത്തില്‍ കിടന്ന മാല പൊട്ടിച്ചെടുക്കുകയായിരുന്നു.മഠത്തിന്‍പടി-പാറയ്ക്കല്‍ റോഡില്‍ പാടിക്കല്‍ ജോര്‍ജ് കുട്ടിയുടെ വീട്ടിന്‍റെ അടുക്കളയില്‍ കടന്നു കയറിയ മോഷ്ടാക്കള്‍ക്ക് ഉള്ളിലെ മുറികളില്‍ പ്രവേശിക്കാനായില്ല. ഈ വിടിനു സമീപംതന്നെ കൊച്ചുമെതിക്കളത്തില്‍ സെബാസ്റ്റ്യന്‍ വര്‍ക്കി(ജോസുകുട്ടി)യുടെ വീടിന്‍റെ പിന്‍വാതിലിന്‍റെ രണ്ട് താഴുകള്‍ തകര്‍ത്തു.
മറ്റു ചില വീടുകളിലും മോഷണശ്രമം നടന്നതായി സ്ഥിരീകരിക്കാത്ത റിപ്പോര്‍ട്ടുണ്ട്.
പാരപോലെയുള്ള ആയുധമാണ് പിന്‍വാതില്‍ തിക്കിത്തുറക്കാന്‍ എല്ലാ വീടുകളിലും ഉപയോഗിച്ചത്. ഗവണ്‍മെന്‍റ് സ്കൂളിന്‍റെ പിന്‍ഭാഗത്തുള്ള വീട്ടിലാണ് ആദ്യം മോഷണം നടന്നതെന്ന് കരുതപ്പെടുന്നു.തുടര്‍ന്ന് പുലര്‍ച്ചെ രണ്ടരയോടെ മോഷ്ടാക്കള്‍ സ്റ്റീഫന്‍ മാത്യുവിന്‍റെ വീട്ടിലും തുടര്‍ന്ന് പാടിക്കലും കൊച്ചുമെതിക്കളത്തിലുമെത്തി. സ്റ്റീഫന്‍ മാത്യുവിന്‍റെ വീട്ടില്‍നിന്ന് കറുകച്ചാല്‍ പോലീസ് സ്റ്റേഷനില്‍ വിരമറിയിച്ചതിനെത്തുടര്‍ന്ന് പോലീസ് സ്ഥലത്തെത്തി തെരച്ചില്‍ നടത്തുന്നതിനിടെ നാലുണിയോടെയാണ് പി.വി. ജോണിന്‍റെ വീട്ടില്‍ കവര്‍ച്ച നടന്നത്. മോഷ്ടാക്കള്‍ വിവിധ സംഘങ്ങളായി തിരിഞ്ഞാണ് കവര്‍ച്ച നടത്തിയതെന്നും സംശയിക്കപ്പെടുന്നു.
സ്റ്റീഫന്‍ മാത്യുവിന്‍റെയും പി.വി. ജോണിന്‍റെയും വീടുകള്‍ക്കുള്ളിലും പരിസരത്തും മോഷ്ടാക്കള്‍ ആക്രമിക്കാന്‍ കരുതിയിരുന്ന വലിയ കല്ലുകള്‍ കണ്ടെത്തി. പിന്‍വാതിലിലിന്‍റെ പൂട്ടും ഇരുന്പു പട്ടയും തകര്‍ത്താണ് മോഷ്ടാക്കള്‍ പി.വി ജോണിന്‍റെ വീട്ടില്‍ കടന്നത്. വാതിലില്‍ തിക്കിയപ്പോള്‍ കട്ടിളയില്‍ ഉറപ്പിച്ചിരുന്ന ഇരുന്പു പട്ടയുടെ സ്ക്രൂ ഊരുകയായിരുന്നു.
മാല പൊട്ടിച്ചെടുക്കുന്പോള്‍ പി.വി. ജോണിന്‍റെ മരുമകള്‍ ബിന്ദു ഉണര്‍ന്നെണീറ്റ് നിലവിളിച്ചു. അതുകേട്ട് വിനോദും പി.വി. ജോണും എഴുന്നേറ്റു. മഞ്ഞ നിക്കര്‍ മാത്രം ധരിച്ച മോഷ്ടാവ് തുറന്നിട്ട പിന്‍വാതിലിലൂടെ പുറത്തേക്ക് ഓടുന്പോള്‍ മുന്നില്‍നിന്നും വീടിനു നേരേ ശക്തമായ കല്ലേറുണ്ടായി. കല്ലേറില്‍ ജനാലച്ചില്ലുകള്‍ തകര്‍ന്നു. പിന്നീട് വീടിനു ചുറ്റിലും കല്ലുകള്‍ കണ്ടെത്തി.
സോണാവില്ലയില്‍ സ്റ്റീഫന്‍ മാത്യുവിന്‍റെ വീടിന്‍റെ കിടപ്പുമുറിയില്‍ സൂക്ഷിച്ചിരുന്ന ബാഗാണ് കവര്‍ന്നത്. മുറിയിലൂടെ ആരോ നടക്കുന്നത് ശ്രദ്ധയില്‍പെട്ട സ്റ്റീഫന്‍ മാത്യുവിന്‍റെ ഭാര്യ അത് മകനാണെന്നാണ് ആദ്യം ധരിച്ചത്.സംശയം തോന്നി പരിശോധിച്ചപ്പോള്‍ മകന്‍ അടുത്ത മുറിയില്‍ ഉറങ്ങുന്നത് ശ്രദ്ധയില്‍ പെട്ടതിനെത്തുടര്‍ന്നാണ് മോഷണം നടന്നതായി അറിഞ്ഞത്. മുറിയില്‍നിന്ന് മോഷ്ടിച്ച ബാഗിലുണ്ടായിരുന്ന എഴുന്നൂറ് രൂപ കൈക്കലാക്കിയ മോഷ്ടാക്കള്‍ ബാഗ് ഉപേക്ഷിച്ചു. ഇത് പിന്നീട് ഇരുന്നൂറ് മീറ്ററോളം അകലെ വഴിയില്‍ കണ്ടെത്തി.
പാടിക്കല്‍ ജോര്‍ജ് കുട്ടിയുടെ വീടിന്‍റെ പിന്‍വാതില്‍ ഇടിച്ചുതുറന്നെങ്കിലും ഉള്ളിലെ മുറികളില്‍ കടക്കാനാകാതെ മോഷണശ്രമം പരാജയപ്പെടുകയായിരുന്നു.
കൊച്ചുമെതിക്കളത്തില്‍ ജോസുകുട്ടിയുടെ വീടിന്‍റെ പിന്‍വാതിലിന്‍റെ ഒരു പൂട്ട് തകര്‍ത്തപ്പോഴേക്കും വീട്ടുകാര്‍ ഉണര്‍ന്നതിനെത്തുടര്‍ന്ന് മോഷ്ടാക്കള്‍ ശ്രമം ഉപേക്ഷിക്കുകയായിരുന്നു. അതേസമയം ജീവന്‍ തിരിച്ചുകിട്ടിയതിന്‍റെ ആശ്വാസത്തിലാണ് പി.വി. ജോണിന്‍റെയും സ്റ്റീഫന്‍ മാത്യുവിന്‍റെയും കുടുംബം.
മോഷണത്തെക്കുറിച്ചുള്ള വിവരമറിഞ്ഞതോടെ മഠത്തിന്‍പടി മേഖലയിലെ ജനങ്ങള്‍ ആശങ്കയിലായി. ആക്രമണത്തിന് സജ്ജരായെത്തുന്ന മോഷ്ടാക്കളെ നേരിടാന്‍കഴിയാത്ത നിസ്സഹയാവസ്ഥയിലാണ് നാട്ടുകാര്‍. മോഷ്ടാക്കളെ കണ്ടെത്തുന്നതിന് പോലീസിനും പരിമിതിയുണ്ട് എന്ന തിരിച്ചറിവ് ആശങ്ക വര്‍ധിപ്പിക്കുന്നു.
കഴിഞ്ഞ വര്‍ഷം ഫെബ്രുവരിയില്‍ നെടുംകുന്നം പള്ളിപ്പടിയിലും പരിസര പ്രദേശങ്ങളിലുമായി അഞ്ചു വീടുകളില്‍ മോഷണ ശ്രമം നടന്നിരുന്നു. കഴിഞ്ഞവര്‍ഷം ഒക്ടോബര്‍ 23ന് നെടുംകുന്നത്ത് രണ്ടു വീടുകളുടെ പിന്‍വാതില്‍ തകര്‍ത്ത് 22 പവനും പണവും അപഹരിച്ചിരുന്നു. ഈ സംഭവങ്ങളിലൊന്നും പ്രതികളെക്കുറിച്ച് യാതൊരു സൂചനയും ഇതുവരെ ലഭിച്ചിട്ടില്ല.
No comments:
Post a Comment