വിഷമയം 'ട്രിവാന്‍ഡ്രം ലോഡ്ജ്'

(mangalam.com പ്രസിദ്ധീകരിച്ചത്)

'ട്രിവാന്‍ഡ്രം ലോഡ്ജ്' എന്നൊരു ബോറ് സിനിമ കണ്ടപ്പോഴാണ് 'ബാച്ചിലര്‍പാര്‍ട്ടി' എത്രയോ ഭേദം എന്നു മനസ്സിലായത്. 'ബാച്ചിലര്‍പാര്‍ട്ടി' റിലീസ് ചെയ്തപ്പോള്‍ അതിലെ അശ്ലീല സംഭാഷണങ്ങളെക്കുറിച്ച് എഴുതിയിരുന്നു. കഴിവുള്ള കുറേപ്പേര്‍ ആ സിനിമയില്‍ സഹകരിച്ചെങ്കിലും കുടുംബസമേതം സിനിമ കാണാന്‍ വന്നവര്‍ തലകുനിച്ചിരുന്നു മാനം രക്ഷിച്ച കാര്യമാണ് എഴുതിയത്. മാത്രമല്ല, ആ സിനിമയ്ക്ക് എന്തിനാണ് സെന്‍സര്‍ സര്‍ട്ടിഫിക്കറ്റ് കൊടുത്തത് എന്നൊക്കെ പരാതിയുണ്ടായിരുന്നു. എന്നാല്‍ 'ട്രിവാന്‍ഡ്രം ലോഡ്ജ്' സംവിധാനം ചെയ്ത വി.കെ. പ്രകാശ് എന്തിനുവേണ്ടിയാണ് ഇത്തരമൊരു വഷളന്‍ ചിത്രം ചെയ്തത്. ഇതിലും ഭേദമായിരുന്നില്ലെ ഷക്കീല സിനിമകള്‍ എന്നാണ് യുവതലമുറ ചോദിച്ചത്.

 അത്തരം സിനിമകള്‍ കാണാന്‍ കുടുംബസമേതം ആരും പോയിരുന്നില്ല. എന്നാല്‍ കുടുംബപ്രേക്ഷകരെയും യുവനിരയേയും ചതിക്കുകയും അപമാനിക്കുകയുമാണ് 'ട്രിവാന്‍ഡ്രം ലോഡ്ജ്' വഴി ചെയ്തത്. ഈ വൃത്തികെട്ട സിനിമയ്ക്ക് 'എ' സര്‍ട്ടിഫിക്കറ്റ് കൊടുക്കാതിരുന്നത് സാറ്റലൈറ്റ് റൈറ്റ് നഷ്ടപ്പെടാതിരിക്കാനായിരുന്നില്ലെ? വെറുതെയല്ല നിര്‍മ്മാതാക്കളുടെയും വേണ്ടപ്പെട്ടവരുടെയും പ്രതിനിധികളെ സെന്‍സര്‍ ബോര്‍ഡില്‍ കുത്തിത്തിരുകിയത്. ഇതിലും ഭേദം സെന്‍സര്‍ബോര്‍ഡ് പിരിച്ചുവിടുകയല്ലെ? 

ഇത്തരം സിനിമകള്‍ക്കുനേരെ സമരം ചെയ്യാന്‍ ആരുമില്ല. അംബേദ്കര്‍, പിപ്പിലിലോസുകള്‍ എന്നീ സിനിമകള്‍ പ്രദര്‍ശിപ്പിക്കാനും എതിര്‍ക്കാനും ശ്രമിക്കുന്നവര്‍ 'ട്രിവാന്‍ഡ്രം ലോഡ്ജ്' പോലുള്ള സിനിമകള്‍ക്കു പച്ചക്കൊടി കാണിക്കുന്നതിന്റെ രഹസ്യമാണ് മനസ്സിലാകാത്തത്.