കറുകച്ചാലില്‍ പേ ആന്‍റ് പാര്‍ക്ക് സൗകര്യം ഉണ്ടായിരുന്നെങ്കില്‍!

ഇരുചക്ര വാഹനമോ കാറോ കറുകച്ചാലില്‍ പാര്‍ക്ക് ചെയ്ത് ജോലിക്കും മറ്റ് ആവശ്യങ്ങള്‍ക്കും കോട്ടയം, ചങ്ങനാശേരി തുടങ്ങിയ സ്ഥലങ്ങളിലേക്ക് പോകുന്നവരില്‍ ഇങ്ങനെ ആഗ്രഹിക്കാത്തവരുണ്ടാവില്ല. 

നെടുംകുന്നത്തുനിന്നും കറുകച്ചാലിലെത്തി വാഹനം അവിടെ വച്ച് ജോലിക്ക് പോകുന്ന  അനേകംപേരുണ്ട്. നിലവില്‍ പാര്‍ക്കിംഗ് സൗകര്യമില്ലാത്തതിനാല്‍ പഴയ വൈദ്യുതി ബോര്‍ഡ് ഓഫീസ് പരിസരത്തും ബസ് സ്റ്റാന്‍ഡിനു മുന്നിലെ കെ.ടി.ഡി.സി ബിയര്‍ പാര്‍ലറിനടുത്തുള്ള മരച്ചുവട്ടിലും പരിസരത്തെ വഴിയരികിലുമൊക്കെയാണ് ഭൂരിഭാംഗംപേരും വാഹനം പാര്‍ക്ക് ചെയ്യുന്നത്. 

കറുകച്ചാലില്‍ കെ.ടി.ഡി.സി ബിയര്‍ പാര്‍ലറിനു സമീപത്തെ മരച്ചുവട്ടില്‍ പാര്‍ക്ക് ചെയ്തിരിക്കുന്ന 

ഇരുചക്ര വാഹനങ്ങള്‍

വൈകുന്നേരം തിരിച്ചെത്തുന്പോഴേക്കും വണ്ടികള്‍, പ്രത്യേകിച്ച് ഇരുചക്ര വാഹനങ്ങള്‍ രാവിലെ വച്ച സ്ഥലത്തുണ്ടാവില്ല.വണ്ടി പാര്‍ക്ക് ചെയ്യാനും എടുത്തുകൊണ്ടുപോകാനുമെക്കെ സൗകര്യംപോലെ എത്തുന്നവര്‍ അവിടെ ഇരിക്കുന്ന വാഹനങ്ങള്‍ സൗകര്യംപോലെ മാറ്റുകയാണ് പതിവ്. കൂടുതല്‍ വാഹനങ്ങള്‍ പാര്‍ക്ക് ചെയ്യുന്നതുമൂലം നേരത്തെ വച്ച വണ്ടികള്‍ പുറത്തെടുക്കാന്‍ കഴിയാത്തതും കാക്ക അപ്പിയിടുന്നതും പൊടിശല്യവുമൊക്കെ വേറെ.

ഈ സാഹചര്യം കണക്കിലെടുത്ത് പഞ്ചായത്ത് മുന്‍കൈ എടുത്ത് കറുകച്ചാല്‍ ബസ് സ്റ്റാന്‍ഡ് പരിസരത്ത് എവിടെയെങ്കിലും ഒരു പാര്‍ക്കിംഗ് ബേ തുടങ്ങുന്നത് നന്നായിരിക്കും. ചങ്ങനാശേരി റെയില്‍വേ സ്റ്റേഷനിലെ പാര്‍ക്കിംഗ് ഏരിയ പോലെ (അത്രയും ഏരിയ ഇല്ലെങ്കിലും) വിശാലവും മാലിന്യമുക്തവുമായ പാര്‍ക്കിംഗ് സൗകര്യമുണ്ടെങ്കില്‍ പണം നല്‍കി വണ്ടി പാര്‍ക്ക് ചെയ്യാന്‍ ആളുകള്‍ക്ക് മയുണ്ടാവില്ല. പേ ആന്‍റ് പാര്‍ക്ക് സംവിധാനം ഏര്‍പ്പെടുത്തുന്ന കാര്യം സ്വകാര്യ വ്യക്തികള്‍ക്കും ആലോചിക്കാവുന്നതാണ്.