skip to main |
skip to sidebar
ഹിറ്റുകളിലാത്ത മൂന്നു മാസം
(രാഷ്ട്രദീപിക സിനിമ)
ഫ്‌ളോപ്പുകളുടെ മൂന്നു മാസമാണ് മലയാള സിനിമയില്‍ കടന്നു പോകുന്നത്. ഇതുവരെ റിലീസിനെത്തിയത് 22 ചിത്രങ്ങള്‍. ഇതില്‍ മലയാള സിനിമക്ക് ആശ്വസ വിജയം നല്‍കിയത് ഒരേ ഒരു ചിത്രം. അണിയറയിലും അരങ്ങിലുമെല്ലാം പുതുമുഖങ്ങള്‍ നിരന്നു നിന്ന സെക്കന്റ് ഷോ എന്ന ചിത്രം മാറ്റിനിര്‍ത്തിയാല്‍ മലയാള സിനിമയെ കാണുമ്പോള്‍ ഭയന്ന് മാറി നടക്കേണ്ടി വരുന്ന അവസ്ഥയാണിപ്പോള്‍. ഈ അവസ്ഥയ്ക്ക് ഉടനെയൊന്നും ഒരു മാറ്റവും പ്രതീക്ഷിക്കേണ്ട എന്നു തന്നെയാണ് നമ്മുടെ സിനിമക്കാര്‍ വ്യക്തമാക്കുന്ന നയം.
ഈ അടുത്തകാലത്ത്, തല്‍സമയം പെണ്‍കുട്ടി എന്നിവ ആവറേജ് വിജയം നേടി ഇപ്പോഴും തീയേറ്ററുകളിലുണ്ട്. വരും ദിവസങ്ങളില്‍ മെഗാബജറ്റ് ചിത്രങ്ങള്‍ എത്തുമ്പോഴേക്കും ഇവയുടെ ഭാവി എന്താകുമെന്ന് കണ്ടറിയേണ്ടതുണ്ട്. ബാക്കിയുള്ള മലയാള ചിത്രങ്ങള്‍ വരിവരിയായി പരാജയത്തിന്റെ രുചിയറിഞ്ഞു കഴിഞ്ഞു.
പരാജയങ്ങളുടെ കാരണങ്ങള്‍ മലയാള സിനിമ പോയവര്‍ഷങ്ങളിലെല്ലാം നിരത്തുന്നവ തന്നെ. കഥയും കഴമ്പുമില്ലാത്ത തട്ടിക്കൂട്ട് ചിത്രങ്ങള്‍, വമ്പന്‍ ബജറ്റും പേറി വരുമ്പോള്‍ നിര്‍മ്മാതാവിനെ കടക്കെണിയില്‍ പെടുത്തിക്കൊണ്ട് തകര്‍ന്നു വീഴുന്നു. കഥയും കാര്യവുമൊക്കെയുണെ്ടങ്കിലും മോശം മാര്‍ക്കറ്റിംഗുകൊണ്ടും തീയേറ്ററുകളുടെ അഭാവംകൊണ്ടും ചില നല്ല ചിത്രങ്ങളും പരാജയപ്പെടുന്നു. സിദ്ധാര്‍ഥ് ഭരതന്റെ നിദ്ര ഇക്കൂട്ടത്തില്‍ പെടുത്താവുന്ന ഒരു ചിത്രമാണ്. ഈ അടുത്ത കാലത്ത് എന്ന ചിത്രവും ലഭിച്ചതില്‍ കൂടുതല്‍ തീയേറ്ററുകള്‍ തീര്‍ച്ചയായും അര്‍ഹിച്ചിരുന്നു.
സെക്കന്റ് ഷോ, ഈ അടുത്ത കാലത്ത് എന്നീ ചിത്രങ്ങളെ പോയ വാരങ്ങളില്‍ മിക്ക റിലീസിംഗ് സെന്ററുകളില്‍ നിന്നും പുതിയ ചിത്രങ്ങള്‍ക്ക് വേണ്ടി മാറ്റിയിരുന്നുവെങ്കിലും ഇവക്ക് നല്ല പ്രേക്ഷക പ്രതികരണമുണെ്ടന്ന് മനസിലാക്കി തീയേറ്ററുകളിലേക്ക് തിരിച്ചുകൊണ്ടുവന്നിട്ടുമുണ്ട്. ഇത് ഒരു നല്ല ലക്ഷണമായി എടുത്തു പറയാവുന്ന ഒരു കാര്യമാണ്.
ഓര്‍ക്കുട്ട് ഒരു ഓര്‍മ്മക്കൂട്ട് എന്ന പുതുമുഖങ്ങളുടെ ചിത്രമാണ് ഈ വര്‍ഷാദ്യത്തില്‍ പ്രേക്ഷകരിലേക്ക് എത്തിയ ആദ്യ ചിത്രം. റീമാ കല്ലുങ്കലും കുറച്ച് പുതുമുഖങ്ങളും അഭിനയിച്ച ഈ ചിത്രം സംവിധാനം ചെയ്തത് മനോജ് - വിനോദ് എന്നീ ഇരട്ട സംവിധായകരായിരുന്നു. തീയേറ്ററില്‍ തികഞ്ഞ പരാജയം നേരിടാനായിരുന്നു ചിത്രത്തിന്റെ വിധി. കഴമ്പില്ലാത്ത കഥയും അടുക്കും ചിട്ടയുമില്ലാത്ത തിരക്കഥയുമൊക്കെയായി ഈ ചിത്രം പ്രേക്ഷകന്റെ ക്ഷമയെ പരീക്ഷിച്ചപ്പോള്‍ 2012ലെ പരാജയങ്ങളുടെ തുടക്കമാണ് പ്രേക്ഷകര്‍ കണ്ടത്.
തൊട്ടുപിന്നാലെയെത്തിയത് അസുരവിത്ത് എന്ന എ.കെ സാജന്‍ ചിത്രം. ആസിഫ് അലി എന്ന യുവതാരത്തെക്കൊണ്ട് പ്രായത്തില്‍ കവിഞ്ഞ ജോലികള്‍ ചെയ്യിപ്പിച്ച ഈ ചിത്രം തീയേറ്ററില്‍ അമ്പേ പരാജയപ്പെട്ടു. അസുരവിത്തിന്റെ ക്ഷീണം പ്രേക്ഷകര്‍ക്ക് മാറുന്നതിനു മുമ്പു തന്നെയാണ് കുഞ്ഞളിയന്‍ എന്ന ചിത്രവും തീയേറ്ററുകളിലെത്തിയത്. സജിസുരേന്ദ്രന്‍ കൃഷ്ണാ പൂജപ്പുര ടീമിന്റെ കുഞ്ഞളിയനും അസുരവിത്തില്‍ നിന്നും അല്പം പോലും വ്യത്യസ്തമായില്ല. അനവധി നിരവധിയായ കാഴ്ചകള്‍ കണ്ട് പ്രേക്ഷകര്‍ കണ്ണുതള്ളിയത് മാത്രം മിച്ചം. മലയാള സിനിമയിലെ ഒരു വിഭാഗം സിനിമക്കാരുടെ പൊതുസ്വഭാവമാണ് ഈ സിനിമകള്‍ കാട്ടിത്തന്നത്.
കഥയും കാര്യവുമില്ലാതെ സിനിമയൊരുക്കാമെന്ന ധാരണകളാണ് ഈ സിനിമകള്‍ വ്യക്തമാക്കിയതെങ്കില്‍, ഇത്തരം ദുഷിച്ച പ്രവണതകളെ വിമര്‍ശിക്കാനെത്തിയ പത്മശ്രീ ഡോക്ടര്‍ സരോജ്കുമാര്‍ അതിലും വലിയ ദുരന്തമായിമാറി എന്നത് തികഞ്ഞ വിരോധാഭാസമായി നില്‍ക്കുന്നു. മലയാള സിനിമയിലെ ദുഷ്പ്രവണതകളെയും തെമ്മാടിത്തരങ്ങളെയും തുറന്നു വിമര്‍ശിക്കാന്‍ ശ്രീനിവാസന്‍ കണെ്ടത്തിയ വഴിയാണ് പത്മശ്രീ ഡോക്ടര്‍ സരോജ്കുമാര്‍ എന്ന സിനിമ. എന്തെല്ലാം പ്രവണതകളെ ഈ സിനിമയിലൂടെ ശ്രീനിവാസന്‍ വിമര്‍ശിച്ചുവോ, ആ വിമര്‍ശനങ്ങള്‍ക്കെല്ലാം പത്മശ്രീ ഡോക്ടര്‍ സരോജ്കുമാറും വിധേയമായി മാറി എന്നതാണ് സത്യം. യാതൊരു ലോജിക്കുമില്ലാതെ സിനിമയൊരുക്കുക, പ്രേക്ഷകനെ വെറും മണ്ടന്‍മാരാക്കുക നിര്‍മ്മാതിവിന് നഷ്ടമുണ്ടാക്കികൊടുക്കുക തുടങ്ങിയ കാര്യങ്ങളില്‍ സരോജ്കുമാറും അല്പം പോലും പിന്നോട്ടുപോയില്ല.
ശരാശരി പ്രതീക്ഷമാത്രമുണ്ടായിരുന്ന ചിത്രങ്ങളുടെ അവസ്ഥയാണ് ഈ ചിത്രങ്ങളൊക്കെ കാണിച്ചു തന്നെതെങ്കില്‍ ഏറെ പ്രതീക്ഷയോടെ കാത്തിരുന്ന മലയാള ചിത്രങ്ങള്‍ തീയേറ്ററില്‍ അമ്പേ തകര്‍ന്നടിയുന്ന കാഴ്ചയാണ് പിന്നീട് കണ്ടത്. ലാല്‍ ജോസ് - ബെന്നി.പി.നായരമ്പലം - ദിലീപ് ടീമിന്റെ സ്പാനിഷ് മസാല, റോഷന്‍ ആന്‍ഡ്രൂസ്, ബോബി സഞ്ജയ് - മോഹന്‍ലാല്‍ ടീമിന്റെ കാസനോവ എന്നിവയാണ് ഈ പരാജയങ്ങള്‍. സാമ്പത്തിക വരുമാനത്തിന്റെ കണക്കുകളും കണക്കിലെ കളികളും നിരത്തി അണിയറക്കാര്‍ വിജയമെന്ന് വാദിച്ചാല്‍ പോലും അതൊരു വാദഗതി മാത്രമായിരിക്കും. തീയേറ്ററില്‍ ഈ സിനിമകളുടെ അവസ്ഥ പ്രേക്ഷകന്‍ നേരിട്ട് രുചിച്ചതു തന്നെയല്ലേ. മുന്‍കാലങ്ങളില്‍ വലിയ ഹിറ്റുകള്‍ സൃഷ്ടിച്ചു എന്ന ലേബലില്‍ എത്തുന്ന കൂട്ടുകെട്ടുകള്‍ കൊണ്ടു മാത്രം വീണ്ടുമൊരു ഹിറ്റ് ഉണ്ടാവില്ല എന്ന് സ്പാനിഷ് മസാലയും, കാസനോവയും തെളിയിച്ചു. ആശയ ദാരിദ്രം തന്നെയായിരുന്നു രണ്ടു ചിത്രങ്ങളെയും പരാജയപ്പെടുത്തിയത്. കാസനോവ ദൃശ്യഭംഗിക്ക് വേണ്ടി ലോകം മുഴുവന്‍ കറങ്ങി ചിത്രീകരണം നടത്തിയപ്പോള്‍ പ്രേക്ഷകര്‍ക്ക് ദഹിക്കുന്ന ഒരു കഥയുണ്ടാക്കുവാന്‍ അണിയറക്കാര്‍ മറന്നുപോയി എന്നതാണ് പരാജയത്തിന്റെ കാരണം.
ശ്രീനാഥ് രാജേന്ദ്രന്‍ സംവിധാനം ചെയ്ത് ദുള്‍ക്കര്‍ സല്‍മാന്‍ നായകനായ സെക്കന്റ്‌ഷോ എന്ന ചിത്രം എത്തിയപ്പോഴാണ് മലയാള സിനിമക്ക് ഈ വര്‍ഷത്തെ ആദ്യ വിജയം ലഭിച്ചത്. അണിയറയിലും സ്‌ക്രീനിലും പുതുമുഖങ്ങളായിരുന്നുവെങ്കിലും ഈ ചിത്രത്തെ പ്രേക്ഷകര്‍ സ്വീകരിച്ചു. പുതുമയുള്ള ഒരു പ്രമേയം അവകാശപ്പെടാനുണ്ടായിരുന്നില്ല എങ്കിലും ചിത്രത്തിന്റെ അവതരണ ശൈലിയാണ് പ്രേക്ഷകരെ രസിപ്പിച്ചത്. ചിത്രത്തില്‍ കുരുടി എന്ന കഥാപാത്രത്തിലൂടെ സണ്ണിവെയിന്‍ എന്ന നടന്‍ മികച്ച പ്രകടനം കാഴ്ചവെച്ചു. പുതിയ റിലീസ് ചിത്രങ്ങള്‍ എത്തിയപ്പോള്‍ സെക്കന്റ് ഷോ തീയേറ്ററുകളില്‍ നിന്നും മാറ്റിയിരുന്നുവെങ്കിലും ഈ ചിത്രത്തിന് ലഭിച്ച ജനപ്രീതി വീണ്ടും സെക്കന്റ് ഷോയെ തീയേറ്ററുകളിലേക്ക് തിരിച്ചു കൊണ്ടുവന്നിരിക്കുന്നു. സൂപ്പര്‍ഹിറ്റ് എന്ന് വിശേഷിപ്പിക്കാവുന്ന കൊമേഴ്‌സ്യല്‍ വിജയം ഇതിനോടകം സെക്കന്റ് ഷോ നേടിക്കഴിഞ്ഞു.
എന്നാല്‍ സെക്കന്‍ഷോയുടെ വിജയം മലയാള സിനിമയില്‍ ഒരു തുടര്‍ച്ചയായി നിലനിന്നില്ല. സ്ഥിരം തട്ടിക്കൂട്ട് പരിപാടികളില്‍ നിന്നും വഴിമാറിനടക്കാന്‍ ബഹുഭൂരിപക്ഷം സംവിധായകരും, താരങ്ങളും, നിര്‍മ്മാതാക്കളും, എഴുത്തുകാരുമൊന്നും തയാറാവാത്തതുകൊണ്ട് മലയാള സിനിമ പതിവ് ട്രാക്കില്‍ തന്നെ മുമ്പോട്ടു പോകുന്ന കാഴ്ചയാണ് പിന്നീട് കണ്ടത്. ഞാനും എന്റെ ഫാമിലിയും എന്ന ജയറാം ചിത്രം ടെലിവിഷന്‍ പരമ്പരകളെ തീയേറ്ററുകളിലേക്ക് എത്തിക്കുവാനുള്ള ശ്രമമായിരുന്നു. ടെലിവിഷന്‍ രംഗത്ത മുതിര്‍ന്ന സംവിധായകന്‍ കെ.കെ രാജീവ് ഒരുക്കിയ ഞാനും എന്റെ ഫാമിലും ടെലിവിഷന്‍ പരമ്പര നിലവാരം മാത്രമേ നല്‍കിയുള്ളു. സിനിമയുടെ പ്രേക്ഷകരെ ആകര്‍ഷിക്കാന്‍ ചിത്രത്തിന് കഴിഞ്ഞതേയില്ല. ബിഗ് സ്‌ക്രീനും മിനി സ്‌ക്രീനും രണ്ടും രണ്ടാണെന്ന് തിരിച്ചറിയാന്‍ കഴിയാതെ പോകുമ്പോഴാണ് ഇത്തരം തികഞ്ഞ പരാജയങ്ങള്‍ സംഭവിക്കുന്നത്.
പിന്നീട് കൊച്ചി, മുല്ലശേരിമാധവന്‍ കുട്ടി നേമം പി.ഒ, തൊമ്മാടിക്കൂട്ടം, ഈ തിരക്കിനിടയില്‍ തുടങ്ങി കഥയില്ലാത്ത ജന്മങ്ങളുടെ സമയമായിരുന്നു വന്നത്. ഇതില്‍ മുല്ലശേരിമാധവന്‍ കുട്ടി മാത്രമാണ് ഒരു വാരമെങ്കിലും തീയേറ്ററില്‍ പിടിച്ചു നിന്നത്. അതും ഒരു വിജയം എന്നു പറയാനുള്ള അവസ്ഥയില്‍ എത്തിയതുമില്ല. മറ്റു ചിത്രങ്ങളാകട്ടെ വന്നതും പോയതും പ്രേക്ഷകര്‍ അറിഞ്ഞതേയില്ല. ബോളിവുഡ് സംവിധായകന്‍ ശ്രീറാം രാഘവന്റെ ജോണി ഗദ്ദാര്‍ എന്ന സസ്‌പെന്‍സ് സിനിമ മലയാളത്തില്‍ റീമേക്ക് ചെയ്ത് ഉന്നമാക്കിയപ്പോള്‍ നല്ലൊരു പരാജയം തന്നെയാണ് പ്രേക്ഷകര്‍ കണ്ടത്. അഭിനേതാക്കളുടെ പ്രകടനവും, സംവിധാനത്തിന്റെ മികവും ജോണി ഗദ്ദാറിന്റെ ഏഴയിലക്കത്തുപോലും വന്നില്ല എന്നത് പ്രേക്ഷകരെ ചിത്രത്തില്‍ നിന്നും അകറ്റി.
കലവൂര്‍ രവികുമാറിന്റെ ഫാദേഴ്‌സ് ഡേ എന്ന ചിത്രമാണ് പിന്നീട് തീയേറ്ററിലേക്കെത്തിയത്. കലവൂര്‍ രവികുമാറിന്റെ മികച്ച തിരക്കഥ തന്നെയായിരുന്നു ഈ ചിത്രമെങ്കിലും വേണ്ടവിധം സംവിധാന മികവ് പ്രകടിപ്പിക്കാന്‍ അദ്ദേഹത്തിന് കഴിഞ്ഞില്ല. പുതുമുഖ അഭിനേതാക്കളായി എത്തിയവര്‍ മോശം പ്രകടനം നല്‍കിയപ്പോള്‍ പരാജയമാകാനായിരുന്നു ചിത്രത്തിന്റെ വിധി. തുടര്‍ന്ന് സിദ്ദിഖ് ചെന്നമഗലൂരിന്റെ ഊമക്കുയില്‍ പാടുമ്പോള്‍, അലി അക്ബറിന്റെ ഐഡിയല്‍ കപ്പിള്‍ എന്നിവ തീയേറ്ററില്‍ വന്നതും പോയതും ആരുമറിഞ്ഞില്ല. നിര്‍ഗുണ ചിത്രങ്ങളുടെ ഗണത്തിലേക്ക് രണ്ടു പേരുകള്‍ കൂടി എന്നതിനപ്പുറം ഈ ചിത്രങ്ങള്‍ക്ക് യാതൊരു പ്രസക്തിയുമുണ്ടായിരുന്നില്ല.
എന്നാല്‍ നിദ്ര, ഈ അടുത്ത കാലത്ത് എന്നി ചിത്രങ്ങള്‍ സിനിമയെ സ്‌നേഹിക്കുന്ന പ്രേക്ഷകര്‍ക്ക് അല്പം പ്രതീക്ഷ നല്‍കുക തന്നെ ചെയ്തു. സിദ്ധാര്‍ഥ് ഭരതന്‍ സംവിധാനം ചെയ്ത നിദ്രയും, അരുണ്‍കുമാര്‍ സംവിധാനം ചെയ്ത ഈ അടുത്ത കാലത്തും ശരാശരി നിലവാരം പുലര്‍ത്തിയ ചിത്രങ്ങള്‍ തന്നെയായിരുന്നു. എന്നാല്‍ മാര്‍ക്കറ്റിംഗിലെ പ്രശ്‌നങ്ങളും തീയേറ്ററുകളുടെ അഭാവവുമാണ് ഈ ചിത്രങ്ങളെ പ്രതികൂലമായി ബാധിച്ചത്. നിദ്ര പോലെയൊരു ചിത്രം ഒരിക്കലും ഇന്‍ഷ്യല്‍ കളക്ഷന്‍ ലഭിക്കുന്ന ഒരു ചിത്രമല്ല എന്നത് തീയേറ്റര്‍ ഉടമകള്‍ മനസിലാക്കേണ്ടതുണ്ട്. ലോംഗ് റണ്ണില്‍ മാത്രമാണ് ഇത്തരം ചിത്രങ്ങള്‍ക്ക് പ്രസക്തിയുള്ളത്. അതുകൊണ്ടു തന്നെ ഹോള്‍ഡ് ഓവര്‍ എന്ന പേരു പറഞ്ഞ് ഇത്തരം ചിത്രങ്ങള്‍ ആദ്യ ദിവസങ്ങളില്‍ തന്നെ തീയേറ്ററില്‍ നിന്നും മാറ്റുന്ന പ്രവണതയ്ക്ക് ഒരു മാറ്റം വരേണ്ടതുണ്ട്. ഇത്തരം പ്രതീകൂലമായ സാഹചര്യങ്ങളിലും ഈ അടുത്തകാലത്ത് എന്ന ചിത്രം റിലീസ് ചെയ്ത തീയേറ്ററുകളിലൊക്കെ സജീവമായി പ്രദര്‍ശനം തുടരുന്നുണ്ട്.
തല്‍സമയം പെണ്‍കുട്ടി എന്ന സിനിമയും ഇവിടെ എടുത്തു പറയേണ്ടതുണ്ട്. ഒരു മികച്ച സിനിമ എന്നു പറയാവുന്ന ഘടകങ്ങള്‍ പലതും തല്‍സമയം ഒരു പെണ്‍കുട്ടിയിലില്ല. ഈ ചിത്രത്തില്‍ പ്രേക്ഷകനെ ആകര്‍ഷിക്കുന്ന ഘടകം നിത്യാമേനോന്റെ അഭിനയ പ്രകടനമാണ്. ചിത്രത്തില്‍ പൂര്‍ണ്ണമായും നിത്യാമേനോന്‍ നിറഞ്ഞു നില്‍ക്കുന്നു. ഒരു ഫീമെയില്‍ ലീഡ് സിനിമക്ക് താരതമ്യേന മികച്ച സ്വീകരണം പ്രേക്ഷകരില്‍ നിന്നും ലഭിച്ചു എന്നത് ചെറിയ കാര്യമല്ല. എന്നാല്‍ ഒരു ക്ലീന്‍ ഹിറ്റായി മാറാന്‍ തല്‍സമയം ഒരു പെണ്‍കുട്ടിക്ക് കഴിഞ്ഞിട്ടുമില്ല.
ഇടയ്ക്ക് കാണുന്ന നല്ല ലക്ഷണങ്ങളെ നശിപ്പിച്ചുകൊണ്ട് വീണ്ടും തല്ലിപ്പൊളി സിനിമകള്‍ കൂടുതല്‍ കൂടുതലായി മലയാള സിനിമയില്‍ മാലിന്യകുമ്പാരം പോലെ വന്നു നിറയുന്നു എന്നത് തന്നെയാണ് ഇവിടെയുള്ള ഏറ്റവും വലിയ പ്രതിസന്ധി. അച്ഛന്റെ ആണ്‍മക്കള്‍, ക്രൈംസ്റ്റോറി എന്നീ നിര്‍ഗുണ ചിത്രങ്ങള്‍ തന്നെ ഉദാഹരണം. കഥയോ, കഴമ്പോ ഇല്ലാതെ ഇറങ്ങുന്ന ഇത്തരം ചവറുകള്‍ തന്നെയാണ് എന്നും മലയാള സിനിമയെ നശിപ്പിക്കുന്നത്.
ഏറ്റവും അവസാനമായി എത്തിയ മമ്മൂട്ടിയുടെ ഡബിള്‍ റോള്‍ ചിത്രം ശിക്കാരിയും തീയേറ്ററില്‍ അമ്പേ പരാജയപ്പെട്ടു. മമ്മൂട്ടിയുടെ ആരാധകര്‍ പോലും തീയേറ്ററില്‍ ചിത്രത്തെ കൈവിട്ടു. എവിടെയും കൊട്ടും, കുരവയും, ആര്‍പ്പുവിളിയുമൊന്നുമുണ്ടായില്ല. രണ്ടു മമ്മൂട്ടിയെ കാണാം എന്നതുപോലും ആരാധകരെ പ്രലോഭിപ്പിച്ചില്ല. ഇതൊക്കെ പരാജയപ്പെടാനുള്ളത് തന്നെയാണ് എന്ന് ആരാധകര്‍ പോലും തീര്‍ച്ചപ്പെടുത്തിയിരുന്നു എന്നതാവാം കാരണം. അപ്പോള്‍ പിന്നെ സാധാരണ പ്രേക്ഷകന്റെ ഒരു അവസ്ഥയെക്കുറിച്ച് പറയേണ്ടതില്ലല്ലോ. ദേശിയ പുരസ്‌കാരമൊക്കെ വാങ്ങിയിട്ടുണെ്ടന്ന് പറയപ്പെടുന്ന അഭയ് സിന്‍ഹ തന്നെയാണോ ഈ സിനിമ സംവിധാനം ചെയ്തത് എന്ന് സംശയിക്കേണ്ടിയിരിക്കുന്നു. അന്യഭാഷയില്‍ നിന്ന് നായികയെ കൊണ്ടുവരുന്നതുപോലെ സംവിധായകനെയും കൊണ്ടുവന്നാലൊന്നും സിനിമ വിജയിക്കില്ല എന്ന് ശിക്കാരി ബോധ്യപ്പെടുത്തുന്നു.
എന്തു തന്നെയായാലും മലയാള സിനിമയുടെ ആകെത്തുക എടുത്തു നോക്കുമ്പോള്‍ മാന്യമായൊരു നിലവാരം എവിടെയും കാണാനില്ല. പരാജയപ്പെട്ടേ അടങ്ങു എന്ന വാശിയില്‍ സിനിമകള്‍ കെട്ടിയൊരുക്കപ്പെടുമ്പോള്‍, അവയൊക്കെ വിജയങ്ങളാണെന്ന് സിനിമക്കാര്‍ മാത്രം അവകാശപ്പെടുമ്പോള്‍, പ്രേക്ഷകര്‍ സിനിമ കണ്ടിട്ട് മോശം മാത്രം പറയുമ്പോള്‍, തീയേറ്ററുകളിലേക്ക് പ്രേക്ഷകര്‍ എത്താതെ വരുമ്പോള്‍... മലയാള സിനിമയുടെ ദുരവസ്ഥ അവസാനിക്കുന്നില്ല എന്ന ചിത്രം തന്നെയാണ് ലഭിക്കുന്നത്.
ഈ ലേഖനം തയാറാക്കുമ്പോള്‍ ഒരു നിര ചിത്രങ്ങള്‍ റിലീസിന് തയാറെടുത്തു നില്‍ക്കുകയാണ്. ജോസേട്ടന്റെ ഹീറോ, ഓഡിനറി, മാസ്റ്റേഴ്‌സ്, കിംഗ് ആന്‍ഡ് കമ്മീഷണര്‍ തുടങ്ങി ചെറുതും വലുതമായ സംരംഭങ്ങള്‍. വരാനിരിക്കുന്ന ഈ ചിത്രങ്ങള്‍ക്ക് മലയാള സിനിമയില്‍ ഒരു പുത്തന്‍ ഉണര്‍വ്വ് സമ്മാനിക്കാന്‍ കഴിയട്ടെ എന്ന് ആശംസിക്കാം.
.jpg)
ഈ അവസ്ഥയ്ക്ക് ഉടനെയൊന്നും ഒരു മാറ്റവും പ്രതീക്ഷിക്കേണ്ട എന്നു തന്നെയാണ് നമ്മുടെ സിനിമക്കാര്‍ വ്യക്തമാക്കുന്ന നയം.
ReplyDelete