വിവാഹത്തട്ടിപ്പു വീരന്‍ സെക്‌സ് റാക്കറ്റിലെ കണ്ണിയെന്നു സംശയം

കറുകച്ചാല്‍: ആദ്യഭാര്യയുടെ പരാതിയെത്തുടര്‍ന്നു തിങ്കളാഴ്ച പിടിയിലായ വിവാഹത്തട്ടിപ്പു വീരന്‍ സെക്‌സ് റാക്കറ്റിലെ കണ്ണിയെന്നു സംശയം. ഇയാളുടെ മൂന്നാം ഭാര്യയും സംശയത്തിന്റെ നിഴലിലാണ്. പാലക്കാട് പന്നിയങ്കര കല്ലിങ്കല്‍പാടം കുട്ടപ്പുര സുബ്രഹ്മണ്യന്റെ മകന്‍ കെ.എസ്. പ്രസാദും മൂന്നാം ഭാര്യ നെടുംകുന്നം സ്വദേശിനിയായ മുപ്പത്താറുകാരി യുമാണ് സെക്‌സ് റാക്കറ്റിലെ കണ്ണിയെന്നു സംശയിക്കുന്നത്. ഇവര്‍ക്കു 12ഉം എട്ടും വയസുള്ള കുട്ടികളുണ്ട്.


സാമ്പത്തികശേഷി കുറഞ്ഞ കുടുംബത്തിലെ അംഗമായ പ്രസാദിനും ലക്ഷംവീട് കോളനിയില്‍ താമസിച്ചു തയ്യല്‍ ജോലി ചെയ്തു വന്നിരുന്ന മൂന്നാം ഭാര്യക്കും നെടുംകുന്നം പരുത്തിമൂട്ടില്‍ 40 ലക്ഷം രൂപയുടെ വീടും ഇന്നോവ കാറും വാങ്ങാന്‍ പണം എങ്ങനെ ലഭിച്ചുവെന്ന ചോദ്യമാണ് ലക്ഷങ്ങള്‍ കൊയ്യുന്ന നക്ഷത്ര വേശ്യാലയങ്ങളിലേക്കു വിരല്‍ചൂണ്ടുന്നത്.


മൂന്നാം ഭാര്യയും പ്രസാദും കറുകച്ചാലിനു സമീപം ഏതാനും വര്‍ഷം മുമ്പ് വാടകയ്ക്കു താമസിച്ചിരുന്നതായും അന്നു ദിവസവും ധാരാളം വാഹനങ്ങള്‍ ഇവിടെ വന്നുപോയിരുന്നതായും നാട്ടുകാര്‍ പറഞ്ഞു. 


നാട്ടുകാരുടെ സംശയം ബലപ്പെട്ടപ്പോള്‍ ഇതു മനസിലാക്കി ഇവര്‍ കോട്ടയത്ത് ഒരു ഫ്‌ളാറ്റിലേക്ക് ഇടപാടുകള്‍ മാറ്റിയെന്നും പറയുന്നു.


മൂന്നാം ഭാര്യ മുമ്പു താമസിച്ചിരുന്ന നെടുംകുന്നത്തെ ലക്ഷംവീട് കോളനിയില്‍നിന്നു പെണ്‍കുട്ടികളെ ആവശ്യക്കാര്‍ക്ക് എത്തിച്ചുകൊടുത്തിരുന്നതായും ആക്ഷേപമുണ്ട്. 


ഹോം നഴ്‌സ് എന്ന വ്യാജേനയാണു പെണ്‍കുട്ടികളെ എത്തിച്ചിരുന്നത്. ഇക്കാരണത്താല്‍ കോളനിയില്‍നിന്ന് ഒരു പെണ്‍കുട്ടി ഒളിച്ചോടിയതായും നാട്ടുകാര്‍ പറയുന്നു. മൂന്നാം ഭാര്യയുടെ അയല്‍വാസിയായ യുവതി പണമിടപാട് സംബന്ധിച്ച് ആത്മഹത്യ ചെയ്തതിനു പിന്നിലും ഇവര്‍ക്കു പങ്കുള്ളതായി സംശയമുണ്ട്. 


സിനിമ, ആല്‍ബം ഫീല്‍ഡുമായി ബന്ധമുണ്ടായിരുന്ന പ്രസാദിനു നീലച്ചിത്ര നിര്‍മാണ സംഘങ്ങളുമായും ആലപ്പുഴയില്‍ ഹൗസ്‌ബോട്ടുകളും റിസോര്‍ട്ടുകളും കേന്ദ്രീകരിച്ചുള്ള അനാശാസ്യസംഘങ്ങളുമായും ബന്ധമുള്ളതായി സംശയിക്കുന്നു. സമൂഹത്തില്‍ അറിയപ്പെടുന്നവരും രാഷ്ട്രീയ നേതാക്കള്‍വരെയും ഇവരുടെ അടുത്ത് നിത്യസന്ദര്‍ശകരാണെന്നും ആക്ഷേപമുണ്ട്.


പരുത്തിമൂട് പ്രസാദിന്റെ വീടു പണിത കോണ്‍ട്രാക്ടറും മൂന്നാം ഭാര്യയുമായി അവിഹിതബന്ധമുണ്ടായിരുന്നതായും പ്രസാദ് എത്തിയപ്പോള്‍ ഈ ബന്ധം തകര്‍ന്നതിലുള്ള പക തീര്‍ക്കാനായി പ്രസാദിന്റെ കഥകളറിയാവുന്ന ഇയാള്‍ ആദ്യഭാര്യയെയും ബന്ധുക്കളെയും വിവരമറിയിക്കുകയായിരുന്നുവെന്നും സൂചനയുണ്ട്. 

(ദീപിക ദിനപ്പത്രം മാര്‍ച്ച് 15, 2012)