.jpg)
തൃശൂര്‍ ജില്ലയിലെ സ്വകാര്യ ആശുപത്രി നഴ്സുമാര് നടത്തുന്ന സമരത്തിനു പിന്തുണ പ്രഖ്യാപിച്ചു സംസ്ഥാന തലത്തിലേക്കു സമരം വ്യാപിപ്പിക്കാന്‍ യുണൈറ്റഡ് നഴ്‌സസ് അസോസിയേഷന്‍ സംസ്ഥാന കമ്മിറ്റി തീരുമാനിച്ചു. ഡിസംബര്‍ ആദ്യം മുതല്‍ സംസ്ഥാന വ്യാപകമായി അനിശ്ചിതകാല സമരം തുടങ്ങും. സമരം ഒത്തുതീര്‍പ്പാക്കുന്നതുമായി ബന്ധപ്പെട്ടു ഹൈക്കോടതി മീഡിയേഷന്‍ സമിതി ഇന്നു വീണ്ടും ചര്‍ച്ച നടത്തുന്നുണ്ട്. ഇതു പരാജയപ്പെട്ടാല്‍ 25നു മാനേജ്‌മെന്‍റുകള്‍ക്ക് സമര നോട്ടീസ് നല്‍കും.
നാളെ മുതല്‍ ജില്ലയിലെ മുഴുവന്‍ നഴ്‌സുമാരെയും സമരത്തില്‍ പങ്കെടുപ്പിക്കാനാണു സംഘടനയുടെ തീരുമാനം. സഹകരണ ആശുപത്രികളിലേക്കും സമരം വ്യാപിപ്പിക്കാന്‍ തീരുമാനിച്ചിട്ടുണ്ട്. സര്‍ക്കാര്‍ ആശുപത്രികളിലെ നഴ്‌സുമാരുടെ സംഘടനാ നേതാക്കളുമായും വിഷയം ചര്‍ച്ച ചെയ്യാന്‍ യുഎന്‍എ സംസ്ഥാന കമ്മിറ്റി തീരുമാനിച്ചു. മദര്‍ ആശുപത്രിക്കു മുന്നില്‍ ജില്ലയിലെ നഴ്സുമാര് നടത്തുന്ന സമരം 75 ദിവസം പിന്നിട്ടു. സമരത്തിനു പിന്തുണ പ്രഖ്യാപിച്ച് നഴ്‌സ് പി. രശ്മി ആരംഭിച്ച നിരാഹാര സമരം എട്ട് ദിവസം പിന്നിട്ടു.
സംസ്ഥാന കമ്മിറ്റി യോഗത്തില്‍ പ്രസിഡന്‍റ് ജാസ്മിന്‍ ഷാ അധ്യക്ഷത വഹിച്ചു. എം.വി. സുധീപ്, സുജനപാല്‍, ബെല്‍ജോ ഏലിയാസ്, റൈവി വര്‍ഗീസ്, ജിതിന്‍ ലോഹി, നവീന്‍ പി. വര്‍ഗീസ്, ശരത് വിശ്വംഭരന്‍, സുധീപ് കൃഷ്ണന്‍, മീര തോമസ്, ജിഷ ജോര്‍ജ് എന്നിവര്‍ പ്രസംഗിച്ചു.
(വാര്‍ത്ത-മലയാള മനോരമ)
No comments:
Post a Comment