ആട്ടിയോടിച്ച 'അമ്മ' തിലകനെ തലോടാനെത്തുന്നു

തനിക്ക് സത്യമെന്നു തോന്നിയ കാര്യങ്ങള്‍ തുറന്നു പറഞ്ഞതിന്‍റെ പേരില്‍ നടന്‍ തിലകനെ പുറത്താക്കിയ ചലച്ചിത്ര താരങ്ങളുടെ സംഘടനയായ അമ്മ ഇപ്പോള്‍ അദ്ദേഹം ജീവിതത്തനും മരണത്തിനുമിടയില്‍ കഴിയുന്പോള്‍ തലോടാനെത്തുന്നു. 

തിലകന്‍റെ ചികിത്സയ്ക്ക് അമ്മ സഹായം നല്‍കുമെന്ന് നടന്‍ മമ്മൂട്ടിയാണ് ഇന്നു പ്രഖ്യാപിച്ചത്. കിംസ് ആസ്പത്രിയില്‍ തിലകനെ സന്ദര്‍ശിച്ച ശേഷം മാധ്യമങ്ങളോട് സംസാരിക്കവേയാണ് അദ്ദേഹം ഇക്കാര്യം അറിയിച്ചത്. തിലകന് സാന്പത്തിക സഹായം നല്‍കുമെന്ന് ആരോഗ്യ മന്ത്രി വി.എസ്. ശിവകുമാര്‍ പ്രഖ്യാപിച്ചതിനു പിന്നാലെയാണ് മമ്മൂട്ടിയുടെ പ്രഖ്യാപനം വന്നത്.

സര്‍ക്കാര്‍ സഹായം പ്രഖ്യാപിച്ച സാഹചര്യത്തില്‍ അദ്ദേഹത്തോടുള്ള വൈരാഗ്യം തുടരുന്ന അമ്മയ്ക്കെതിരെ ജനരോഷമുയരുമെന്ന ഭയമാണ് ഈ സഹായ പ്രഖ്യാപനത്തിനു പിന്നിലുള്ളതെന്ന് ചൂണ്ടിക്കാണിക്കപ്പെടുന്നു. അമ്മയുടെ വിലക്ക്  അവഗണിച്ച് സംവിധായകന്‍ രഞ്ജിത്ത് ഇന്ത്യന്‍ റുപ്പീ എന്ന ചിത്രത്തില്‍ തിലകനെ അഭിനയപ്പിച്ചിരുന്നു.

ഇതോടെ അമ്മയുടെ മസിലുപിടുത്തം ഏറെക്കുറെ വൃഥാവിലായിരുന്നു. തുടര്‍ന്ന് സ്പിരിറ്റ്, ഉസ്താദ് ഹോട്ടല്‍ തുടങ്ങിയ ചിത്രങ്ങളിലും അദ്ദേഹം അഭിനയിച്ചു. ഈ സാഹചര്യത്തില്‍ തിലകന്‍ സംഘടനയിലേക്ക് തിരിച്ചുവരുന്നതില്‍ എതിര്‍പ്പില്ലെന്ന് ഭാരവാഹികള്‍ വ്യക്തമാക്കി.