മൂത്തമോള് നേഴ്സാ...ചൊവ്വേല്...

പണ്ട് മോള് ഡല്‍ഹീലാന്നു പറയുന്നതാരുന്നു പത്രാസ്. പിന്നെ ദുബായിലേക്കും സൗദി അറേബ്യയിലേക്കും നഴ്സുമാര്‍ ഒഴുകിത്തൊടങ്ങിയതോടെ ഡല്‍ഹീ ഡിമ്മായി.

 കൊറെ കഴിഞ്ഞപ്പോള്‍ നമ്മുടെ നാട്ടിലെ പെന്പിള്ളാര് യൂകെയിലോട്ടും യു.എസിലോട്ടും പറന്നു. പിന്നാലെ ആശ്രിത വിസേല് അവരുടെ കെട്ടിയവന്‍മാരും. ഇനിയിപ്പം അധികം വൈകാതെ മോള് ചൊവ്വേലാണെന്ന് പറയുന്ന കാര്‍ന്നോമ്മാരെ നമുക്ക് കണ്ടുമുട്ടാനാകും. ചൊവ്വേന്നു വെച്ചാല്‍ അന്തോനീസു പുണ്യാളന്‍റെ നൊവേനയുള്ള ഏതേലും ചൊവ്വാഴ്ച്ചപ്പള്ളിപ്പോയിരിക്കുകയാണെന്നല്ല. സാക്ഷാല്‍ ചൊവ്വാ ഗ്രഹത്തിലുള്ള ഏതേലും ആശൂത്രില് നേഴ്സാണെന്ന്.

ഞങ്ങളിത് വെറുതെ വച്ചു കാച്ചുന്നതല്ല. വൈകാതെ മനുഷ്യന്‍മാര് ചൊവ്വേലും താവളമുറപ്പിക്കുമെന്ന മട്ടിലാണ് കാര്യങ്ങടെ പോക്ക്.ചൊവ്വേടെ മണ്ണിലിറങ്ങിയ അമേരിക്കന്‍ ബഹിരാകാശ ഏജന്‍സിയായ നാസയുടെ  പര്യവേഷണവാഹനം ക്യൂരിയോസിറ്റി ചൊവ്വയുടെ പ്രതലത്തിന്‍റെ കൂടുതല്‍ വ്യക്തതയാര്‍ന്ന ചിത്രങ്ങള്‍ അയച്ചിരിക്കുകയാണ്.  ചൊവ്വയില്‍ നിന്നും ആദ്യമായി മനുഷ്യശബ്ദം കേള്‍പ്പിക്കുയും ചെയ്തു. താമസിയാതെ ചൊവ്വയിലേക്ക് മനുഷ്യരെ അയയ്ക്കുമെന്ന നാസ അഡ്മിനിസ്‌ട്രേറ്റര്‍ ചാള്‍സ് ബോള്‍ഡന്‍റെ പ്രഖ്യാപനമാണ് ക്യൂരിയോസിറ്റി പ്രക്ഷേപണം ചെയ്തത്. 

അവിടെ വെള്ളം കിട്ടാന്‍ വകുപ്പുണ്ടെന്നും ജീവന്‍റെ വല്ല കൊണിശവും കണ്ടെത്താന്‍ പറ്റുവോന്ന് നോക്കിവരികയാണെന്നുമാണ് ഇപ്പോ പറയുന്നത്. ഇപ്പം ശശി ആരായി?

എങ്ങാനും മനുഷ്യന്‍ ചൊവ്വേല്‍ താമസമുറപ്പിച്ചാല്‍ അവിടെ മലയാളിയുമുണ്ടാകുമെന്ന കാര്യത്തില്‍ അപ്പീലില്ലല്ലോ. അല്ലാതെ അവിടെ ആശുപത്രികളും ഹോട്ടലുകളും തുണിക്കടകളും തട്ടുകടകളുമൊക്കെ എങ്ങനെ പ്രവര്‍ത്തിക്കും. ഈലോകത്തും ഈ-ലോകത്തും പരലോകത്തും  എല്ലാ കോണിലും മലയാളിയുണ്ടെന്ന കാര്യം ആരോടും പറയേണ്ട കാര്യമില്ലല്ലോ. അപ്പോപ്പിന്നെ ചൊവ്വാലോകത്തും സ്ഥിതി വ്യത്യസ്ഥമായിരിക്കില്ല.

ഭൂമി-ചൊവ്വാ റോക്കറ്റ് സര്‍വീസ്, ചൊവ്വയിലെ വിസ, വര്‍ക്ക് പെര്‍മിറ്റ് അങ്ങനെ എന്തെല്ലാം കാര്യങ്ങളാ ഇനി വരാനിരിക്കുന്നത്. ഏതായാലും നാട്ടില്‍  അന്നന്നേപത്തനുവേണ്ടി ആത്മഹത്യാഭീഷണി മുഴക്കേണ്ട ഗതികേടില്‍ കഴിയുന്ന നഴ്സുമാര്‍ക്കും അവര്‍ മുഖേന ആയിരക്കണക്കിന് കുടുംബങ്ങള്‍ക്കും ചൊവ്വ വലിയൊരു ആശ്വാസമാകില്ലെന്ന് ആരു കണ്ടു?