.jpg)
സ്ത്യുത്യര്‍ഹ സേവനത്തിന്‍റെ പാതയില്‍ ആറു പതിറ്റാണ്ട് പൂര്‍ത്തിയാക്കുന്ന മുതിര്‍ന്ന ഹോമിയോ ചികിത്സകന്‍ ഡോ. സി.ഡി. തോമസ് ചെത്തിപ്പുഴയെ(ഡോക്ടര്‍ തോമാച്ചായന്‍) നെടുംകുന്നം പൗരാവലി നാളെ (ഓഗസ്റ്റ് 26, 2012) ആദരിക്കും. നെടുംകുന്നത്തും സമീപ മേഖലകളിലും തലമുറകളുടെ ഡോക്ടര്‍ എന്ന് അറിയപ്പെടുന്ന 82-കാരനായ ഡോ. തോമസ് സാമൂഹിക, ആധ്യാത്മിക മേഖലകളിലും നിറസ്സാനിധ്യമാണ്.
നാളെ ഉച്ചകഴിഞ്ഞ് മൂന്നിന് സെന്റ് ജോണ്‍ ദ ബാപ്റ്റിസ്റ്റ് ഹൈസ്‌കൂള്‍ ഹാളില്‍ നെടുംകുന്നം പഞ്ചായത്ത് പ്രസിഡന്‍റ് ശശികലാ നായരുടെ അധ്യക്ഷതയില്‍ ചേരുന്ന സമ്മേളനം ഡോ. എന്‍. ജയരാജ് എം.എല്‍.എ ഉദ്ഘാടനംചെയ്യും. ആതുരസേവാസംഘം സെക്രട്ടറി ഡോ. വി.ജി. കൃഷ്ണപിള്ള മുഖ്യപ്രഭാഷണം നടത്തും.
നെടുംകുന്നം സെന്റ് ജോണ്‍ ദ ബാപ്റ്റിസ്റ്റ് ഫൊറോനാപ്പള്ളി വികാരി ഫാ. മാത്യു പുത്തനങ്ങാടി, ബ്ലോക്ക് പഞ്ചായത്ത് അംഗം കെ.പി. രവീന്ദ്രന്‍, ഗ്രാമപഞ്ചായത്തംഗം മറിയാമ്മ ജോര്‍ജ്, ഭഗവതി ദേവസ്വം പ്രസിഡന്‍റ് ടി.സി. ബാലകൃഷ്ണന്‍നായര്‍, ജുമാഅത്ത് പ്രസിഡന്‍റ് പി.എം. സെയ്ദ് മുഹമ്മദ് റാവുത്തര്‍, എസ്.എന്‍.ഡി.പി ഡയറക്ടര്‍ ബോര്‍ഡ് അംഗം എം.വി വിശ്വനാഥന്‍, കോണ്‍ഗ്രസ് നെടുംകുന്നം മണ്ഡലം പ്രസിഡന്‍റ് ജോ തോമസ് പായിക്കാട്ട്, സി.പി.ഐ(എം) ലോക്കല്‍ സെക്രട്ടറി എ.കെ. ബാബു, കേരള കോണ്‍ഗ്രസ്(എം) മണ്ഡലം പ്രസിഡന്‍റ് പി.ജെ. ജോണ്‍ പടിഞ്ഞാറേമുറിയില്‍, സി.പി.ഐ ലോക്കല്‍ സെക്രട്ടറി അജി കാരുവാക്കല്‍, മുസ്‌ലിം ലീഗ് ജില്ലാ കമ്മിറ്റിയംഗം സി.ടി. മജീദ് റാവുത്തര്‍, ബി.ജെ.പി നെടുംകുന്നം പഞ്ചായത്ത് പഞ്ചായത്ത് പ്രസിഡന്‍റ് കെ.സി. സുരേഷ്, മര്‍ച്ചന്‍റ്സ് അസോസിയേഷന്‍ പ്രസിഡന്‍റ് സ്‌കറിയ തോമസ് ആനിക്കുഴിയില്‍ തുടങ്ങിയവര്‍ പ്രസംഗിക്കും.
ഡോ. സിബി കുര്യന്‍ സ്വാഗതവും നെടുംകുന്നം ഗ്രാമപഞ്ചായത്ത് പ്രസിഡ ന്‍റ് റെജി പോത്തന്‍ നന്ദിയും പറയും. സംഘടനകളും വ്യക്തികളും ഡോ. തോമസിനെ ആദരിക്കും. ജിജോ ജോണ്‍ നെച്ചികാട്ടും സംഘവും സ്വാഗതഗാനം അവതരിപ്പിക്കും. ഡോ. തോമസ് മറുപടി പ്രസംഗം നടത്തും.
കുറമ്പനാടം ചെത്തിപ്പുഴ ദേവസ്യ-മറിയം ദമ്പതികളുടെ മകനായ സി.ഡി. തോമസ് പെരുമ്പനച്ചി സര്‍ക്കാര്‍ സ്‌കൂള്‍, മാമ്മൂട് ഹൈസ്‌കൂള്‍, കുറമ്പനാടം സെന്റ് പീറ്റേഴ്‌സ് സ്‌കൂള്‍, ചങ്ങനാശേരി എസ്.ബി. ഹൈസ്‌കൂള്‍ എന്നിവിടങ്ങളില്‍ പ്രാഥമിക വിദ്യാഭ്യാസം നേടി. ആതുരസേവനത്തിലൂടെ പൊതുപ്രവര്‍ത്തനം യാഥാര്‍ത്ഥ്യമാക്കുകയും കുറിച്ചിയിലെ ആതുരാശ്രമം മെഡിക്കല്‍ കോളേജ് സ്ഥാപിക്കുകയും ചെയ്ത സ്വാമി ആതുരദാസിനു കീഴില്‍ ഹോമിയോ ചികിത്സ അഭ്യസിച്ചു.
നെടുംകുന്നത്ത് ബന്ധുക്കള്‍ ഉണ്ടായിരുന്നതും അക്കാലത്ത് ആതുരാശ്രമത്തില്‍ ചികിത്സക്കെത്തിയിരുന്ന ഇന്നാട്ടുകാരനായ മരുതിക്കുഴി ഔതച്ചേട്ടന്റെയും കുടുബത്തിന്റെയും പ്രോത്സാഹനവുമാണ് ഇവിടെ ചികിത്സാകേന്ദ്രം തുടങ്ങാന്‍ പ്രചോദനമായതെന്ന് ഡോ. തോമസ് അനുസ്മരിക്കുന്നു. വളരെ പെട്ടൈന്നുതന്നെ ജനകീയ ചികിത്സകന്‍ എന്ന ഖ്യാതി ഡോ. തോമസ് സ്വന്തമാക്കി. നെടുംകുന്നത്തിനു പുറത്തുനിന്നും ഇദ്ദേഹത്തിന്‍റെ ചികിത്സ തേടി ആളുകളെത്തിയിരുന്നു. ദൂരക്കൂടുതലും പ്രതികൂല കാലാവസ്ഥയുമൊക്കെ അവഗണിച്ച് വീടുകളിലെത്തിയും ഡോ. തോമസ് ചികിത്സ നല്‍കി.
ഹോമിയോ ചികിത്സയിലെ മാറ്റങ്ങള്‍ ഉള്‍ക്കൊണ്ടുകൊണ്ടാണ് പള്ളിപ്പടിയിലെ ഡിസ്‌പെന്‍സറി കേന്ദ്രീകരിച്ച് ഇദ്ദേഹം ഇന്നും ചികിത്സ തുടരുന്നത്. നെടുംകുന്നത്ത് എത്താനും ഇക്കാലമത്രയും ഇവിടെ വിജയകരമായി പ്രവര്‍ത്തിക്കാനും സാധിച്ചത് ഈശ്വരാനുഗ്രഹംകൊണ്ടു മാത്രമാണെന്ന് അദ്ദേഹം പറയുന്നു. ''ജാതിമത ഭേദമില്ലാതെ എല്ലാ വിഭാഗം ആളുകളെയും സേവിക്കാന്‍ എനിക്കു കഴിഞ്ഞു. നാട്ടുകാര്‍ ഏറെ സ്‌നേഹവും കരുതലും നല്‍കി. ഇപ്പോള്‍ നാടിന്‍റെ ആദരവ് ഏറ്റുവാങ്ങുമ്പോള്‍ എല്ലാവര്‍ക്കും ഹൃദയപൂര്‍വ്വം നന്ദിയര്‍പ്പിക്കുന്നു''-അദ്ദേഹം പറഞ്ഞു. കുറിച്ചി ആതുരാശ്രമത്തിന്‍റെ ഡയറക്ടര്‍ ബോര്‍ഡിലും നെടുംകുന്നം പഞ്ചായത്തിലെ വര്‍ക്ക് ഗ്രൂപ്പിലും അംഗമായ ഇദ്ദേഹം നെടുംകുന്നം ഇടവകയിലെ ആധ്യാത്മിക പ്രവര്‍ത്തനങ്ങളിലും സജീവ സാന്നിധ്യമറിയിക്കുന്നു. ഡോ. തോമസിന്റെ രണ്ടു മക്കളും മരുമക്കളും ഹോമിയോപ്പതി മേഖലയിലാണ് പ്രവര്‍ത്തിക്കുന്നത്.
ചങ്ങനാശേരി പറാശേരി കുടുംബാംഗമായ റോസമ്മയാണ് ഡോ. തോമസിന്റെ ഭാര്യ. മക്കള്‍:ഡോ. ആലീസ്(മംഗലാപുരം), ഡോ. തോമസ് ജോണ്‍(രാജു), ആനിയമ്മ(ചങ്ങനാശേരി), ടെസി, ലൂസി(യു.കെ), മെര്‍ലിന്‍. മരുമക്കള്‍:ഡോ. സണ്ണി മാത്യു (ഫാദര്‍ മുള്ളേഴ്‌സ് ഹോമിയോപ്പതി മെഡിക്കല്‍ കോളേജ്, മംഗലാപുരം), ഡോ. കൊച്ചുറാണി. പരേതനായ ടോമിച്ചന്‍ മൈലന്തറ ഈര, തങ്കച്ചന്‍ പറപ്പള്ളി ഇരുപതില്‍ പെരുമ്പനച്ചി, സാജു കടന്തോട്ട് ചങ്ങനാശേരി,തോമസ് വാക്കയില്‍ ചെങ്ങരൂര്‍.
നെടുംകുന്നത്തും സമീപ മേഖലകളിലും തലമുറകളുടെ ഡോക്ടര്‍ എന്ന് അറിയപ്പെടുന്ന 82-കാരനായ ഡോ. തോമസ് സാമൂഹിക, ആധ്യാത്മിക മേഖലകളിലും നിറസ്സാനിധ്യമാണ്.
ReplyDeleteഡോക്ടര്‍ തോമാച്ചന് എല്ലാ ആശംസകളും നേരുന്നതിനൊപ്പം ആയുരാരോഗ്യം പ്രാര്‍ഥിക്കുന്നു ........
ReplyDelete